Kalay-Falam Kar Ah SAC Ralkap Cu Bomb Hmang In Kahdoh An Ton Caah 30 Leng An Thi. Sagaing ramṭhen, Kalay in Laitlang lei ah a kalmi SAC ralkap leilawng cu Kalay-Falam lampi ah voi tampi bomb puahhnawh in doh an ton caah SAC ralkap 30 leng an thi tiah theih a si.
Thir kham leilawng 2 telh in thil phurtu leilawng 30 leng le minung thazaang 100 leng he rallam sialtu SAC ralkap hna cu March ni 7 le 9 ah Kalaymyo in Laitlang lei ah an i thawh.
SAC ralkap hna cu Falam khuachung an luh hlan lampi ah Chin tualchung hriamtlai phufonh hna nih voi tampi bomb puahhnawh in an doh hna pin ah kaphnih kar kahdohnak ruang ah SAC ralkap lei a tlawmbik 30 hrawng cu an thi tiah CNDF brigade commander Lian No nih a chim.
“Falam peng an luh hlan ah hriamtlai phu 4 fonh le SAC ralkap kar Taingen le Valung kar ah kahdohnak a chuak, cu kahdohnak ah cun SAC ralkap 6 an thi. Valung in Htinshu sakhan kar ah ni thum chung pehtlai in kan doh hna caah, meng 8 lawng a hlat nain cuka ah cun zan thum an riak. Cu kahdohnak ah cun SAC ralkap 30 an thi” tiah a chim.
Kalay in leilawng tampi he Chinram kal aa thawhmi SAC ralkap hna cu Kalay-Falam kar ah CNA, CNDF, CDM-Siyin, MEDF, KKG-Kalay le PDF-Zoland hna nih an kahdoh hna.
“SAC ralkap hna cu Falam an luh hlan tiang lampi ah pehtlai in CNA he ṭangṭi in kan doh hna, bomb zong kan puahhnawh hna, minung zeizat an thih hi fiang tein cun kan chim kho rih lo” tiah CNDF brigade commander Lian No nih a chim.
Falam le Kalaymyo kar hi meng 80 hrawng a hlat, cu hlan ah cun SAC ralkap nih rallam an sial tikah Kalay-Falam kar hi ni 5 hrawng an rau tawn nain, tutan hi lampi ah kahdoh an ton lengmang caah zarh hnih hrawng an rau, SAC ralkap hna cu March ni 19 ah Falam khuachung an lut kho tiah theih a si. Rallam a sialtu SAC ralkap hna hi Falam khuachung an phanh khawh cang caah Hakha lei ah an lan kho tiah zumh a si.TCP