Ka thiannu-in kan in kawta a scooty a rawn hun meuh chuan ka lo insiam fel diam tawh a. Nidanga a tih fo angin a scooty-horn chu a hmet ri tlak tlak a. Ka phone charge-lai chu ka phawi vat a, ka thiannu, min lo nghak reng tu lampan chuan ka tlan chho thuai a. Kan Office-lampan chuan kan inphur chho ta a.
A THILTAWN MAK TAK CHU Thingpui in-a chhun chawlh kan neih lai chuan ka thawhpui ka thiannu chu ka hnathawhna room-ah a rawn lut a. A thiltawn mak tak mai chu ti hian min hrilh ta a.”Kar hmasa khan ka pi damlo thingtlang atangin an rawn phur chho a, a natna a serious-deuh bawk nen, Durtlang Hospital-ah Doctor ten an admit nghal a.Zirtawp ni tlai a lut kha anni a. Tlai lamah ka tlawh hman ve ta silo a, a zan a zanin keimahin Durtlang lampan chuan ka tlan chho ta a.
Bawngkawn Traffic Point bulah chuan Durtlang Hospital-a kal tum Taxi in-contri tur an lo awm nual a. Chung zingah chuan Nu pakhat, nausen thla ruk mi vel pua hi alo awm ve a. Ka tlanpel thuak a, phurh chhoh mai thaa ka hriat avangin ka let leh a. Chu nu chu a kal duhna hmun te ka zawt a, Durtlang Leitan piah mai ah kan awm atih avangin ka kalna tur nen ain tu-ha bawk a, ka phur chho ve ta a ni.
Durtlang Leitan kan thleng tep tih chuan ka phurh nu chuan chhuk a duh thu a sawi ta tlat mai a. “Ka pi inthlahrung rèng rèng suh, i duh phawt chuan in inthleng ka thlah ang che, naute i paw bawk sia,” ka ti a. Chhuk ka duh atih tlat avangin khimi Leitan thlen hma deuh khian a chhuk ta nge nge a. Mak ka ti viau nang a, engmah phei chu ka sawi duh lem lo. Tluang takin Hospital-ah chu ka thleng a.
Zirtawp atang khan keimah hlirin Hospital-ah chuan ka chho ta ziah a. Mahse mak tih deuh mai ka nei a ni. Kha nu, nausen pua kha Bawngkawn ah sawn alo awm thei ziah mai a, ka phur chho zantin ta mai a. A chhukna thin pawh a ngai bawk kha ani. Kan inphurh chho lai hian ka biak loh chuan a tawng lo tawp ani mai a. Mak ka ti viau ani.
THLA EM NI?Monday-a ka rawn Office theih loh chhan kha ka Pi anat zual deuh vang ani a. Khami zan khan ka damchhunga ka theihnghilh theih tawh loh tur thilmak tak mai ka tawng ta a ni. Ka cousin, ka Pi awmpui tu ber chuan ka scooty hospital-a riah a, a motor a min thlah mai a tum a. Zan a rei ve tawh deuh bawk nen, a awm tho mai. Mahse keimah chauh pawn ka haw thla ngun tho a, ka cousin pawh chu inthlah tir lovin keimah bawk chuan zanrei ah Durtlang Hospital atang chuan ka tlanthla ta a.
Thui ka tlan hmain ruah atla cherh cherh a, chhum lah chu a chhah mup mai leh ta nghal a. Muangchang a tlanin Leitan chu ka thleng ve ta der mai. Ka rinai daihin Leitan ka pel thla chu chhum a chhah a, ka Scooty-headlight chu eng ve viau mahse, chu chhum zing chhah tak chu a chhun tlang mawh khawp mai.
Zawimuangin ka tlan thla det det a, motor dang veivak lah chu an vang pharh leh ta nghal a. Kawi hnihna ka tlan thleng tep tih chuan footpath-ah Nu pakhat naupua hi ka hmu ta thut mai a. Ka tlan chak lo naa, ka tlanpel ta tho a. Ka inngaihtuah chiang a, Durtlang leitan thleng a ka lo phurh chhoh thin ngei kha ani tlatin ka hre ta a. Kawngsir ah ka ding sauh sauh a.
Chu nu ka tlan pelh chiah lampan chuan biak tumin ka tlan chho a, a mak lutuk Mapui, kha nu kha minute khat pawh ral hmain ka hmu zo ta tlat lo. Ka phone light nen foothpath ah chuan a tlanin ka tlan chho a, tumah ka hmu lo. A tirah kha chuan tanpui ka duh avangin ka ding kha ani a. Ka ngaihtuah chiang a, ka hlau thar ta thut a, ka khur nghal char char a. Ka kut a ka ken, ka phone pawh ka hum nghet zo tawh lo.
Hmanhmawh zetin ka Scooty dahna lamah chuan ka tlan thla nghal a. Ka start nung chiah tih chuan Gypsy pakhat hi a rawn tlan thla a. Zah pawh dawn lovin ka lo phar ding ta tawp mai a ni. pakhat naupua an rawn tlan thlak naah an hmuh leh hmuh loh khur hlat hlat chungin ka lo zawt ta tawp a.
Chutiang awm ang an hmuh loh thu an sawi hnu chuan ka thil hmuh chu ka hrilhzui a. Ka phone thlauh pawh driver-in min han lak sak ta nghe nghe a ni. Amak ka ti khawp mai, ka mitvai emaw pawh iti mai thei, kha nu ngei kha ka hmu tlat ani.
Kha Nu naupua ka phurh fo thin ngei kha ani tih hi ka chiang a ni.” tiin ka thawhpui ka thiannu chuan a thiltawn mak tak chu min hrilh ta a.Sawi tur dang ka hre lo. ‘ A MAK HLE MAI ‘ tih bak chu !