2014 November ah Bawipa dawtnak ka rak thei. 2017 December (25) ah Thiangthlarau a ngaih ka chiatter ruang le Pa nawl ka ngaih lo caah 2018 August in a ka hrawmh mi Thiangthlarau he i hawikomhnak nun cu a ka chuh than tikah ka nun hi ttihnak le ralchiatnak le launak lawngte nih a ka den thluahmah.
Ka minung sinak in mithli le pastor te le thlarau mifa hna sinah ka sual i phuan in thla kai cam ter sek hna nain luatnak le ngaithiamnak taktak ka tingco kho lo i ka nun lamthluan ah Bawipa lawmhter loin ka tialcia mi tuanbia dawh hmanh ka nun ning nih nawncek ah a canter thluahmah hna.
2020 in ka nunning le ka sual ning, tuah kai timh mi nakin tuah kai tim bel lo mi tiang hna ka van tuah tikah le Pathian fa ka si buin ka nun duh a nun ti lo ning hi kai hmuh tikah Immanuel Prayer House ah Bawipa ka va fuh than i ka sualnak vialte ka phuan i rawlulh le thlacamnak le Bawipa pa rian ah tiin a lam phunkip tuannak in ka sual kai ngaichih i ngaihthiamnak tling ka ting co cang tiah kai ruah nain a donghnak ahcun Pathian nak in keimah duhnak a bawi deuh timi cu caan nih biachim thluahmah i ngaihthiamnak hi ka co thlu kho taktak lo.
Kumkhat chung ka va um buin Bawipa sin a ra mi hnangam daihnak tling ka tingco lo tikah khamhnak hi a tlau kho ko rua ee titiang in ka lung a rak hring tawn i ka nun kai zoh ahhin hnabei donghnak in ka khat.
Sihmanhsehlaw lungawtawm bu he lungdong lo tein ka sual cuahmah buin Bawipa bia rel, thlacam le tthawngtha ngai nak in Bawipa Thiangthlarau cu ka zawnhnawh peng thotho rih ko. Ka lung hi a donghthlu khawh hrimhrim lonak cu ka rak teh bal cang mi Thiangthlarau umpinak hmual kha ka hlam tuk than caah le khamhcia mi ka si ti ka zumhnak hi a hrampi asi.
Ka nunnak lamthluan hi ka cuan than tawn tikah mi dang hmuhnak cun chungthu lengnaal ka lawh hi voi zeizat remruam dek khi a va si hnga, a tampi lengluang ko lai nain lungdong lonak thluachuah cu Pathian tinhpiak mi caan le khuakhannak a huntlin tikah a ka pek than taktak.Nikum 2022 July thlathok i biakamnak he thla ka camnak ah Bawipa aw ka theih than i kan hman than lai i kan hlawrh than lai, sihmanhsehlaw na sual man caah kan fial mi hi na tuah hrimhrim lai a rak ka ti.
Sihmanhsehlaw nun thianhlimnak um loin Bawipa lungton khawh asi lo bang in caan sau nawn vawlei par tlanh bu he Bawipa nih a ka chawnhnak si ka ti mi le ka tuah mi thil vialte cu ka minung hawi caah cun hruh bia menmen a rak si i ka nun ah thianhlimnak le khrihfa nuncan ziaza tehte le tuahsernak zei hmanh a langh lo tikah kei nih Bawipa fial mi si tiin ka tuah mi cu ka ningzah, mualphonak lawngte le mi nih a molh cang ti rumro in purhdah ka tong thluamah.
Sihmanhsehlaw neksaknak tamtuk le harnak phunkip ka ton ko zongah Pathian kai bochannak le a bia asi ka ti mi ka dirpi nak le mi nih an ka hmuh ning nak in Bawipa fialrian asi tiin ka kalpinak thawng in Bawipa nih, taksa lei ka neih mi (family, friends, relationship, career, properties) a ka chuhchung dih ta hnuah 2023 January ni 1 in April ni 9 tiang rawl ni 40 ulh khawhnak thluachuah a ka hrawmh nak thawng in ka chiatserhnak le dan ka tatnak cu a ka chahpiak dih.
Hallelujah! Dawtnak in a khat mi Bawipa he hin rawl ka ulh lioah siloin ka ulh hnu rawl nem (sanpioh, cite telh lo) in ka ei lioah a tu le tu bia kan i ruah, vanram le hell zong a ka hmuhsak lawng siloin satan riantuannak phunphun hna le a ra lai ding mi hmailei kong zong tampi a ka hmuhsak lawng siloin minung nih kan herhmi nuncan ziaza kong hi tampi in a ka cawnpiak.
Bawipa nih a ka chawnhbiak lio ah khuaruahhar ngai asi mi cu thinglung in mah duhnak i hlawt riangmang in Bawipa sunparnak caah Pathian rian a tuan mi pastors hi Chin miphun ah an thlawm taktak khi si.Minung caah le mah sunparnak caah riantuan mi tampi a ka hmuhsak.
Bawipa nih khuaruahhar a dawtnak thawng in 2023, January 1 in tuni tiangah ni 50 bawipa sinah rawlulh khawhnak thluachuah ka ting co cang. Sihmanhsehlaw ni 40 hi fawi tein ka rak i lim ve lo i Hospital hmun (2) tiang ka rak phan i zarhkhat chung sizung pi ah lungfim huaha loin Bawipa nih nun a ka cawn ter ve pinah nganfahnak phen thluachuah fakpi in a ka co ter.
A hlei in kai lawmh nak cu ni 40 ka ulh rualrual in ni 40 chung bak rawlnem (sanpioh) hi cite loin ka pum caah ka ei piaknak thawng in Bawipa nih khuaruahhar in thluachuah a ka chap.Mah hi hawihlei in ka awr kai sum khawh caah le ka nun kai uk khawh caah siloin Bawipa nih a ka fial caah le pum dawt a biapit zia hi rawl ul bal mi hna ka saya/sayamah sin le hospital i ka pum nganfah ning nih fakpi in an ka cawnpiak caah si.
Bawipa nih a ka pek mi le a ka kamh mi thluachuah hi a tamtuk ahhin a hlei a hluat tiang khi si.Kei nih cun Bawipa aw theih le a ngaihthiamnak te lawng ka rak hlam i ka rak hal mi si ko hmanhsehlaw soiselnak, lunghrinhnak, zawmtaihnak le nautatnak tampi pahchih buin ka lungdong lonak thluachuah cu Bawipa caan a tlin tikah a par ter! Hallelujah!
Chim ding le phuan ding hi a tamtuk caah hmailei ah Bawipa nih phuanchapnak caan thlua kan chuah hram te seh! Rawlulhnak hi mi hmaiah chim phuan tuk ding asi lo a ti mi le Bible ca nih cuticun a ti tiah a chim tawn mi hna ahhin ka rak i tel ve tawn nain khi hna khi tha tein hlat than hna uhlaw rawl ul bel theng lo mi le rawlulh thlacam nun a nei lo deuh an si lai i a ruang cu a thawnnak le a thawtnak hmual kan tep bal ve lo caah a rak si.
Bawipa chawnhnak, holhtheihlo, biaphuan te hna ka zum loh a ti mi zong khi an co ve lo caah si i bible siang inn cawnpiaknak fak piin ai tlaih ve cang mi an si caah fak piin lak piak ding le poimawh tukah chiahpiak ding an si lem lo.
Cun rawl ulh hi mi hmaiah laar a duh mi le hasi nih ka thei hna seh ti a duh mi zong cu an um phung si ko nain Bawipa cu thinlung zoh in bia a ceih zungzaltu asi caah keimah hrimhrim zong hi ka lungput zoh in Bawipa nih bia a ka ceih hrimhrim ve te lai.Cucaah kei nih kai phorhlawt pi mi le kai lawmhnak capar hna hi cu Bawipa nih a tuah mi thil cungah asi ko caah le sunparnak pek ka duh caah si ko seh tihi ka lungput asi.
Hallelujah! “Cucaah cun Cathiang nih, “Porhlawt a duhmi cu Bawipa nih a tuahmi kha i porhlawtpi ko hna seh,” a ti bang khan, porhlawt a duhmi nih cun Bawipa nih a tuahmi tu kha an i porhlawt awk a si.”
Bawipa thimmi ka u nau hna, rawulh fuh hna usih! Kan nun ulh in Bawipa lawmhter uhsih. Kan miphun sinah siseh kan khrihfabuu hrimhrim ahhin rawlulh kong hi au pi bak ding asi. Mipi damnak nunnak a thlengtu taktak hi kan chan ahcun rawlulh thlacamnak asi ee.
Cawnpiaknak nih a chei ti lo mi, crusade nih a thleng khawh ti lo mi le kan mah tein kan tei khawh ti lo mi vialte hi rawlulh thlacamnak in a fawi tuk mi si. Chiatserh ding le, dantat ding le, Pathian thinhunnak nih ka hrawh cikcek lai a timi a biakamnak hmanh a letter than khotu hi rawlulh thlacamnak asi.
Kan lungpuamnak, kan i phorhlawtnak, kan nawlngaih lonak le Pathian duhnak theih khawhlonak thlarauchia vialte, kan nunnak in a thawl khotu cu rawlulh thlacamnak asi! Miphun chiatserhnak,kan pupa chiatserhnak, kan innchungkhar chungah a tlung cang mi chiatserhnak hi rawlulh nak in chah viar cang dingah Jesuh min in kan sawm duh ko ee.
April thla ah Indiana ah Pathian thinhunnak nih Chin khrihfabu pakhat ningzahnak faktuk a chuahternak hnga lo thla fak piin cam ding ah hi ka ca rel mi vialte hna Jesuh min in kan sawm hna. Pathian nih bia phuangtu hmang loin a rian a tuan colh lo.
“Mi nih nang cu, “Ṭhawlmi, hawikom zeihmanh a ngei lomi Zion, an in ti nain, Cuar thar cu ka corhter ṭhan lai i na hma cu ka damter ṭhan lai,” tiah Bawipa nih a ti.” JEREMIAH 30:17