Zeicatiah Jesuh ralchanhtu hna nih Jesuh sin in an ngiatmi hmelchunhnak kongah Jesuh nih a leh hna nak ah ni thum le zan thum timi hi a rak chim.Mt. 12:38-40.
Kha kha hrambunhnâk ah an hman i ‘Ni nga ni ah a thih i zarhpi ni ah a thawh ah cun’ zan thum a tling kho lo tiah an ti.
Cucaah Jesuh thih ni kha Ni thum ni ah thawn i zarhte (sabbath) ni ah thawhter kha an timh tawn. Asinain Cathiang cawnpiak ning a si lo caah an thawn kho lo. Thawn zong a herh lo.
Zeicatiah timh ciammam tein Jesuh nih a thih lai nâk le a thawhțhan lai nak kong a cawnpiakmi ah ZAN THUM timi hi ai tel lo i NI THUM ti a si. Mt. 16:21. Mt. 17:22. Mt. 20:19.
Cucaah BiakamThar ah Jesuh thawhțhannak he ai peh tlai in NI THUM timi hi voi 14 a um. Mk. 8:31. Mk. 9:31. Mk. 10:34. Lk. 9:22. Lk. 18:23. Lk.24:7. Lk. 24:21. Lk. 24:26. Jn. 2:19-22. Lm.10:49. 1Kor. 15:4. (A cung ta pathum he)
Cucaah Baibal nih “NI THUM” timi hi CATHIANG NING a si tiah a ti. 1Kor. 15:4.
Cheu khat nih a thih ni le a thawhțhan ni hna cu ni khat a tlin țung lo, tiah an ti țhan.
Asinain Baibal nih ‘Ni khat tling’ tiah a ti lo.
A thih ni …………….NI KHAT
Thlan um ni. ………NI HNIH
Athawhhan ni. …..NI THUM
NI THUM a tling ko. Cun kum 2000 reng lo Thiang Thlarau nih a um hnawh i a hruai lengmang mi Kawhran (Khrifabu) nih ni Nga ni ah a thi i Zarhpi ni (Baibal nih zarhchung ni hmasa bik a timi) ah a thoțhan timi a zumtu chungin Pathian mi hman tampi an um cang i an um cuahmah lio i hmailei zong ah an um ko rih lai.
Hi nih a langhter mi cu NI THUM timi zumhnak hi Pathian nih a fehter mi zumhnak dik a si ko ti hi a si. Cucaah Ni THUM timi Voi 14 hi ZAN THUM timi voi khat te a ummi nih teiter timh i ni thum ni ah thih ter timh i zarhte ni (sabbath) ni ah thawhter timh hi. Baibal biatak cawnpiaknak in lam a pialmi cawnpiaknak a si.