Voikhat cu putu hna lam an leng. Khuacuanh hmunrem an phak ah khin a tupa nih hman a thlakpi. Ruahlopi khin a tupa nih hitihin bia a hal, “Ka pu, nanmah hna chan lio ah ah IT um lo, kan hmang bal lo na ti si kaw, zeitin hme nan rak um? Computer zong um lo, maivan (internet) zong um lo, TV zong um lo, kutken phone zong um lo, leilawn (mawṯaw) zong um lo. Nan chan lio nun hi cu a nuam bal lai loh. Umhar lai ning! Zeitin hme nan rak um khawh ka ti. Atu chan nan dawi khawh lonak zong hi nan mawh lo, tiah bianengsai khin a hal.
A pu nih a thawh i, “Atu chan mino nan nun ning ko hi hme luakchuak cu! IT nan ti i nan i molhpi. Thlacam zong nan hngal ti lo; mi zawnruahnak zong nan ngei lo; mi upat zong nan thiam lo; ningzah nan hei hngalh hoi lo ning; nan lung a puam i toidornak lungthin zong nan ngei lo; nan nun ah zumh tlak sinak zong a um lo. Kannih 1940-1980 kar minung cu IT kan hmang lo, nain nifatin kan nun in cawn awk phun tampi kan chiahtak a ti.
Nannih cu IT he lente nan i celh; kannih cu lei phudip lak ah hawikom taktak he kan i celh. Atu nan chan bantuk nuamsul in kan rak nung kho lo. Nannih tidur ti nan ding, kannih mau-cong in kan ding. Nannih a tlornal mi tirawl nan ei i nan khing a rih thluahmah lio ah kannih cu meh kio hmanh kan ei kho lo. Nannih kedan ṯhaṯha nan i denh lio kannih cu zaihmanh denh a rak um lo. Atu bantukin nu le pa nih duhchung dinei awk chiahcia hunpiak a rak um lo, docawi thlaipat, purphiar bu he ṯuancop eicop a rak si. Innte tiamnak thilri zong hi atu nan chan bantukin dawr ah cawk a si lo, kanmah tein milem kan siam i cucu kan i celhpi.
Kan nu le pa an rak rum lo caah thilri (material) a kan pe kho lo, nain Dawtnak a kan pek. Kanmah chan minung hi nu le pa biangai le chimhngai chuakthiam chan donghnak kan si ko lai. Atu nannih chan tham cu nan pawng ah mithmuh kuttawngh in a um mi hna ko pei hmuhlo lamhlatnak i a um mi nakin nan hlat deuh hna cu. Kannih chan tham ahcun kan pawngkam a ṯhu/dir mi hna hi umhar in kan chiah ṯung hna lo. Biathaw le bianuam kan saihpi hna cu. Atu nan chan hi a hnoksak tuk. Mi sining le dirhmun zong hlat tuk in ai thlau i nun a har a ti.
Kan chan hi vawlei a bit tuk lio a si. Kutcung hum tlukceo a si. Chantiluan nih a kan fanh tuk cang caah tar thlulo, no thlulo, ngakchia thlulo kan i paih lulh. Ṯhuthmun in vawlei cul khawh chan a si tikah umhar theih a si ti lo. Nain hi chan tihrah ah fak tuk in thlaunak a um mi nih zatlang nun a hnursuan, biaknak bu a hnursuan le pumpak nun a hnursuan mi tampi an um.
Tahchunhnak in kan chim a si ahcun, Pathian kan thangthatnak ah kum upa deuh nih Khrihfa Hlabu an sak duh deuh lai, nain mino nih cun thangthat hla chuak an duh deuh ve lai. Hi bantuk dirhmun chung kan um tikah harnak tampi a um. Thiamnak zong ah kan i thlau, hngalhnam zong ah kan i thlau, uar phun le huam phun zong ah kan i thlau, a zei kip ah rual lonak tlang a sang. Cucaah hruaitu nih zoh thiam a biapi tuk. Carson Twintwin