(Political Party tin a mi te leh Mizoram mipuite ngenna) He thu hi huaisen tak leh pawisak nei lo tak a ziak ka ni lo a, huphurh tak leh inthlahrung tak in ka ziak a ni. Manipur nula pakhat an interview na ka en leh phei chuan min in sum tir zo tawh lo a ni ber zawk a ni. Kum 2016 khan Manipur ah rawngbawl in kan kal a, kawngpui chhiat zia te, berh zia te leh hmasawnna la hnu fum zia te chu a tak ngei in kan han dai ve a.

Chu chu BJP Party chuan remchang ah la in an thlan tlin chuan hmasawnna (development) an tiam ta a, chiang takin BJP chu an sorkar ta reng a ni. Kum 2019 a kan han kal leh chuan, Manipur khaw kil tak tak ni a kan hriat te thlengin kawngpui ṭha an lo phah sak a, hmasawnna chu hmuh theih khawp in, hun reilo te chhungin a rawn thleng ta reng mai a.

Nimahsela, tun ah hian a pawina chu a rawn lang ṭan ta. Manipur buaina chhan hi tamtak a awm ang, mipui in kan hriatpui leh hriat pui lem loh te pawh tamtak a awm ang. A chhan lian tak pakhat ni a ka hriat ve chu, Isua nilo in an ram a tihdam an phal kha a ni.

Manipur kawngpui tha tak tak te leh Lamka/Churachandpur District pakhat chauh pawh a Central Service tamtak awmna ram hi a dam tak meuh em?, hmasawnna (development) ti a kan tuihal em em na hian ram hi a tidam chiah em tih hi ngun tak a kan ngaihtuah a ngai ta in ka hria.

Chu kawngpui ṭha leh hmasawnna a zuan a, a zuanna ram ah chuan kan unau duhtak te chuan damlo a in hria in, an u naute bul min rawn bel mek a ni. Isua nilo in kan ram a tihdam hi Mizoram mipuite chuan i duh ve lo ang u hmiang?, Manipur a kan unau duhtak te pawn harh chhuah zel nan hmang se a van duhawm tak em.

Rawngbawl tho in hmanni khan Arunachal Pradesh ah kan kal a, hei hi mit in ka hmu a, a tak in kan tawng a ni. Pu Modia leh BJP Flag thlenna ah, RSS a zalen zel a, RSS zalenna ah chuan Hindu lalram a zau ve zel a ni, tih hi kan han hmu chiang hle a ni.

Isua tello a hmasawnna hi kan duh tur a ni lo, tih hi ka thinlung chhungril ber hian a au chhuah pui mawlh mawlh mai a ni. Kan ram lungchhiatthlak em em na chhan pakhat chu, BJP chu sorkar na siam tur em chuan la chak lo mahse kan Party hruaitute hian Central BJP nen an inzawm zia chu insawi theihnan leh hma theh a an hmang mai ṭhin te hian thinlung a ti na vawng vawng ṭhin.

Chu chinghnia chuan eng vun pawh rawn sin rawh se, a tum chu Isua Lalram ṭhiah a, Hindu lalram ah India hi siam a ni tho tho. An hmatheh te chu hmasawnna leh changkanna pawh ni rawh se, an hmangaih ber chu Shiva te, Vishnu te, Ganesha etc. te an ni tho tho.

Bible hun lai khan awm ta ila, Lalpa mite khan heng milem pathian beitute an zawm hi kan Pathian khan a duh a ngem?, tih hi i han en thar leh ila, kan Bible hi in keu thar leh ang u hmiang?. Chiang tak in ka sawi theih chu Lalpan a hua a ni tih hi a ni, a dang chu khawngaihin i Bible lo keu leh dawn a nia.

Manipur ah ngei pawh Biak In an hal nasat dan aṭang te hian kan harh chhuah chu a hun tawh takzet a ni, an tum (target) chu Isua hi a ni tih hria ila, an tawk tarh ṭha taktak te hi Isua avangin i hnawl ngam zawk ang u hmiang. Manipur hi BJP lal na ram ni ta lo se hetiang khawp a chet lakna nasa hi a thleng a ngem le?

Chuvang chuan he BJP Party hian sorkar a tum emaw, a la beisei ngam chiah lo a nih pawh in, a sangawi zawn pui theih tur te zawng in Manipur ang tho hian hmasawnna rawn hma theh leh in Mizoram ah pawh bu rawn khuar a van tum leh nasa tawh tak em. Mizoram mipuite chuan Isua lo in kan ram a tihdam hi i phal miahlo ang u.

Puithiam hna thawk tur chauh nilo, ram hruai hna thawk tur a Lalpa hriakthihte pawh khawngaihin huaisen takin rawn tho chhuak tawh rawh u, in tan ṭhahnem ngai takin kan ṭawngtai a, in bul ah kan ding tlat a ni. Kei chuan, he Indona hi Pathian duhdan a kan beih chuan Pathian hi kan lam ah a ṭan ka ring tlat a ni.

A chhan chu kan indona nilo in Lalpa indona a ni tlat a ni. BJP chuan India ram hi Hindu ram ah chan tir a tum mek a, keini pawh in India ram hi Isua ram ah chantir kan tum ve mek bawk a, kan indona a ni ta lo, Lalpa indona a ni ta. BJP ngei pawn an puithiam te chauh hmatheh tawhlo in Political ground aṭangin ram an rawn la ta duai duai a nih ber hi, keini hi kan la tlai em lo ang chu maw? India ram hi Isua ram a nih theihnan kan Evangelist leh Pastor te chauh nghak lo in Political ground aṭang pawh in Pathian ram chu India ram ah a lo thlen theihnan ṭan i la ang u hmiang.

Ka sawi turu hem hem min tihsak em, ni e ka sawi turu reng a ni. Keimahni a awm Thlarau Thianghlim hi he khawvel a awm ai a ropui zawk tih Bible in min hrilh a nih kha (1 John 4:4), chu Pathian Thlarau chakna hmachhuan chuan a lawm Gideona te, Jeptha te, Davida te pawh khan an hneh loh tur an lo hneh a, an ram a milem pathian be tu te an lo hnawh chhuah ṭhin.

Chu Pathian Thlarau chu a la pangai reng a, chu Pathian Thlarau chu kan zing ah hian a la awm reng a ni. India ram aṭanga Independent lam keichuan ka sawi lo,India ram ah hian Pathian ram lo thleng rawh se kan ti a ni zawk. Lalpa thawhpui theih mi, a lam a rilru diktak pu mi hi Lalpan a hmu a nih chuan chumi te kal tlang chuan Pathian zawk in kan ram hi a tidam anga, chu Pathian Thlarau chakna avang chuan India ram ah Isua’n thlen in a van tawh lo ang. Pathian ram chu India ram ah lo. thleng mawlh rawh se.

BJP lo hnawl ngawt hi a la ni ber lo a, Pathian Hriakthih ram hruaitute kal tlang in he ram hi tihdam in a awm chuan siloh chuan damlo na na na chuan a damna tur ni a, a hriat chu a ban mai ta ṭhin zawk a ni. Chuvang chuan, maicham a inthawina hlan tu Puithiam chauh nilo, ram leh hnam a damnan a Lalpa hriakthih mi, sual leh pathian dang te do ngam, Lalpa lam en tlat mi, Lalpa thawhpui theih tur mi, Party tin a awm te hi huaisen tak in rawn ding chhuak turin Isua Krista hming in kan au che u a ni.

Rawngbawltu ka ni a, politics lam ah ring ka rawlh a, tawngkam ka rawn nei ve lam a nilo takzet a ni. Hindu movement thil tum lian tak leh chak tak a kal mek hian engpawh a rawn hmatheh chu lo nise, rawngbawltu ka nihna aṭangin ka rawn do a ni zawk. Party leh Party chu engtiang pawn inbeihna chu lo kal rawh se keichu ka tel

Ve lo a, ka ṭawngtaina zawk chu hei hi a ni, Pathian Hriakthih ram hruaitu rawn chhuak se, anmahni kal tlangin Lalpa’n kan ram hi tidam rawh se. Tichuan, kan pulpit aṭang mai nilo in kan office tin aṭang te, kan sumdawnna hmun tin aṭang te hian Pathian chu a lo ropui dawn a ni. Tichuan, state dang te pawn chu chu lo hmu ve zel se, Pathian ram chu lo zau zel se tih hi ka tawngtai kal lai mek chu a ni.

By admin

Leave a Reply

Your email address will not be published. Required fields are marked *