Israel nih Hamas tapung pawl cu zeitik in dah an tuk hna lai i an cil dih hna lai timi thawngpang lawng te ngeih cio a si. Asinain kan ruahning bantukin thil a kal kho rih lo. Cikhat thinhun lung in mei va tlaih kha san a tlaih lo caah a vun rau pah rih lai.
Gaza khua cu Hamas nih kum 16 tiang an um hnawh cangmi lawng si loin Israel tuknak hmun ah an hmanmi a si caah runvennak le dohnak lam a phunphun in an i ser dih cia cang. Vawlei tang pe 10, 20, 50 in 100 tiang a thuhnak ah tunnel timi thuhnawhnak le Israel dohnak caah lam (khur) meng a zaza in a saumi an cawh dih.
Israel ralkap nih an an theih khawhmi poah cu an bompiak hna nain an theih lomi tam tuk a tang rih. Cun Israel nih kan doh hna seh law zeitin dah kan doh hna lai; khawika in dah kan bawh hna lai; zei bantuk rap in dah kan foih hna lai timi timh cia dih in an ngei.
Fawi tein doh awk an tha ve hrimhrim lo. Tutan ah Hamas tapung tampi an tlaihmi hna an um caah Hamas hmun le umnak tampi an hal khawh hna lai. Asinain fawi te cun an phuang duh ve lai lo. A hrem ta cikcek hna a hau ve lai.
Israel nih an i fiang tuk i Prime Minister Netanyahu zong nih “kan raltuk hi a har lai i a sau zong a sau fawn lai” tiah Israel mipi sinah biachimnak a ngeih lioah a chim. Israel nih kan ral tuk hi a har lai timi an i fiang cia cang ko.
Cucaah ralkap reserve an i chiahmi 300,000 an auh hna; ramleng in a thongthong in volenteer awk Israel ram ah an rak phan. 360,000 leng nih vawleicung raltuknak hriamnak tha bik he in an dum dih hna. Hloh dih hna ding hrimhrim in an i timh lawng si loin “ral kan tho” ti tiang vawlei pi theih an thanhnak zong a si. Pipa taktak in an i tim.
Hamas tapung cu an zate in 30,000 hmanh an tling hnga maw! Amah belte cu Chaklei ramri um Iran dirkamhmi Hezbollah tapung nih hnahnawhnak an pek ngai ve te fawn hna lai. Nichuah leiin Syria lei zong in an i tel fawn men te lai. Asinain US nih fiang tein “rak i thlak hlah U” tiah a chim cang. An raltha tuk lai tiah zumh an um lo. Hamas tu hi biapiin an i chiahmi a si lai tiah ka ruah.
Hamas cu Israel sinah cun chim tlak an si lo. Israel ahcun ralkap Sayaret Matkal tbk in a fit taktakmi special in trained mi ralkap Unit phun tam pi an um hna. Tahchunnak ah nizan Nirukni i hrenmi Israel minung 200 hrawng an khamhtu hna kha Shayetet 13 Unit an si. Ti leiah si seh, tlanglei ah si seh; cunglei in si seh Special in training pekmi an si. A fit bakmi an si.
Israel ralkap ah special in sermi an si. Cun intelligence leiah hin special ralkap an um rih. Sayaret Matkal Unit tiah an auh hna i zei bantukin tih a nunnak hmun le a hlatnak zong ah Intelligence gathering a tuahmi an si.
Shayetet 13 unit bantukin tihnung bak tiah ruahnak an si. A hmun le a caan nih a herhning hoih in special trained Unit phu dangdang an um rih hna. An thiam tuk hna caah “mithla” auhmi zong an um hna.
Ralkap leiin a siah hriamnam le thiamnak lei a siah a let zaza tam deuh in Hamas naak in an tha deuh ko nain caan an la. Cunglei in vanlawng nih Hamas cawlcanghnak inn le hriamnam chiahnak inn tbk hmun 300 deng an an bom cang. A chungah luh in Hamas cawlcanghnak le hrenmi minung chiahnak tbk an kawl cuahmah lio hna a si.
Cun 24 hours caan chungah Chaklei ah a ummi Gaza mipi vialte Tlanglei ah nan zam dih lai. Kir cang u kan in ti hnu hnu lawng ah nan kir te lai tiah Israel ralkap nih an ti hna. Thawng an thanhnak hna cu Gaza cung in catlap ruahsur in an rak surter. Sizung pakhat zong zinglei 6:00am hlan ah nan chuah tak dih lai an ti hna.
Mipi harnak pek kha tlawm seh ti an duh; Hamas tapung vialte thah dih hna i an nehnang vialte hloh dih an duh. Khatlei in US le an hawile ram poah nih a herhning poah in bawmh ding in bia an funh cio hna. US lengbang nih cun US Secretary of States Antony Blinken nih a tlawn colh hna. A rauh hlanah US ralkap lu bik Secretary of Defence LIoyd Austine nih a tlawn colh fawn hna.
A rauh hlanah Congess Senate Majority hruaitu Chuck Schumer nih “zeidah nan herhmi a si” tiah hal awk ka tlawn hna lai tiah a thanh rih. Cucaah hnangam tein Israel nih Hamas cu a kua tiang luh hnawh i thah viar ding in a lam tha bik a kawl lio a si.
A biapi bikmi cu hrenmi minung umnak an theih khawhnak hnga Intelligence gathering kha a biapi tuk. An khamh khawh hna kha atu tiang ahcun biapi cem a si rih.A thah dih cang hna zong ah an konglam theih hmasa le khamh khawh hmasa hna kha biapi cem a si. Siaherhmichiahnakpage