Myanmar ah ruahlo piin a phanmi The Elders Deputy Chairman, Former UN Secretary General Mister Banki Moon nih SAC sin ah hramhram thilsual tuahnak vialte cu ngol in Asean hnatlaknak ngeihmi phun nga cu a tak in tuah ding ah nawlnak a tuah.
The Elders phu nih an chuahmi cathanh ah Mister Banki Moon khualtlawnnak kong he pehtlai in April 25 ah atu bantuk in an langhter hi a si. Hramhram thilsual tuahnak vialte ngolter ding in Myanmar ka ratnak hi a si. Hi kong ah pehtlaihnak a ngeimi vialte nih a tak tuahsernak langhter in rianṭuan caan a si tiah Banki Moon nih cun forhfialnak bia a chim.
Ka khualtlawnnak lamthluan hi hlathlainak tuah ah a si, daihnak, hmailei ruahchannak ngei in zalonnak hmuh ding he aa tlakmi Myanmar ram mizapi caah ka si khawh tawk bawmh ding in Myanmar ah ka ra tiah a chim chap.
Vawleicung minthang hna an i funtomnak The Elders phu in Deputy Chairman Mister Banki Moon hruaimi phu hna cu April 23, ah Naypyidaw an phan, cu hnu April 24 ah SAC chairman Min Aung Hlaing le former president U Thein Sein he tiin tonbiaruahnak an ngei.
Hramhram uknak a latu SAC ralkap nih ram pumpi huap in van lei kahdohnak fak chin in a tuah lioah, Banki Moon Myanmar ram a phanh hi ruah awk ngaingai a um tiah NUG le Myanmar kong ah ngiatthlainak le hlathlainak a tuahtu phu nih an ceih lioah, Banki Moon khualtlawnnak kong he pehtlai in The Elders phu nih atu bantukin thawngthanhnak a tuah hi a si.TCP