Myingyan Ah PDF Ralkap Pakhat Le Hringtu A Nu Cu SAC Ralkap Nih Meithal Zun 7 Le Zen-Kuan He An Tlaih Hna!
Mandalay ramṭhen, Nyaung U khua in Myingyan lei ah a kalmi Nyaung U PDF ralkap pakhat le hringtu a nu cu SAC ralkap nih an inn ah an luhhnawh hna i meithal zun 7 le zen-kuan tampi he an tlaih hna, tiah Khit Thit Media nih a ṭial.
July 13 ah Nyaung U PDF pakhat Mah Ni cu Myingyan i a kal hnu ah SAC ralkap nih Myingyan in Yangon ah a lan ti thawng an theih i, SAC ralkap sergeant Soe Min Aye hruaimi ralkap 2 nih Myingyan No. 13 sang motor dinh hmun ah Yangon kal ding cazin an chek tikah PDF ralkap Mah Ni cu an hmuh.
SAC ralkap nih Nabu-Aing check gate in an bawh hna i zanlei suimilam 6:00 ah Myingyan in a chuakmi khualtlawng motor cu an check i, a chungah Nyaung U PDF ralkap Mah Ni le hringtu a nu cu an tlaih hna, tiah theih a si.
Cu hnu ah Mah Ni le a nu cu Khah Mah Yah 15 ah an hren hna i, Nyaung U i an inn cu July 13 zan suimilam 8:00 ah SAC ralkap nih an va luhhnawh i, M 22 meithal zun 7 le kuanbawm 20, meithal kuan le kutcheh bomb lung 9 an laak.
Nyaung U PDF Mah Ni le hringtu a nu he pehtlaihnak a ngeimi hna zong an hlathlai cuahmah hna, tiah an chim. The Chin Post