Tu zing cu Israel mipi cu raltuknak, thinphannak le mipi nunnunak liamnak in zing an tho hna. Palestinian Hamas raltho pawl nih cung he tang he ruah lo tak in an kah hna.
Rocket 2000 leng in cunglei in an kah hna, tanglei in Hamas tapung nih an luh hna hnawh hna. Israel khuate in khuapi tiang Hamas ralkap an lut. An kah hna i Israel mipi le ralkap 150 an thi.
An tam deuh rih lai tiah an zumh. Hliam a tuarmi hi 987 leng an si. An ceih taktak. Israel ralkap le mipi tam ial zong Hamas tapung nih an tlaih hna. Zeimawzat hmun hna ahcun an i kah an ngol rih lo.
1973 Yom kipur War lio i an rak i chuahsual lio bantuk a si a timi zong an um. Israel thin a hung ngai. Israel Prime Minister Netan Yahu nih cun “ral tuknak chung kan um” tiah a chim.
Cunglei in Israel nih Hamas umnak hmun 17 hrawng an phomh manh cang. Minung 197 hrawng an thi tiah an thanh. 1600 hrawng liam an tuar. An linsa ngaingai lai.
Zeitin dah ruah lo tuk in Hamas nih an luh khawh hnawh hna, Israel intelligence daithlan maw si tiah biahalnak a tam manh ngai zeicatiah tu ni hi Yom Kipur War kum 50 a tlin ni a si. Israel ralkap le Intelligence community lei daitlan a si ko. Luther Tin Hre