Hamas-Israel Kahdohnak A Hnubik Thawngpang Hna. October 7, nirukni in aa thawk mi Hamas-Israel kahdohnak cu pehtlai in a kal rih. Atu tiang ah Israel lei a thi mi 700 renglo le Gaza lei a thi mi 400 renglo an si cang. Kaphnih a thi mi a 1,100 leng an si tinak a si.
Nihin, zarhpini ah Hamas nih Israel ram khuapi pakhat Ashkelon ah rocket missile 100 hrawng an kah ṭhan. Cunglei lawng si loin tanglei kahdohnak zong a fak ngai. Ashkelon khuapi cu Gaza ramri pawng ah a um mi a si.
Hamas nih Tel Aviv khuapi pawng i Ben Gurion International Airport cu kah an duh mi a si nain an kheng lo. Vawleicung ramkip in Israel ah a zuang ding mi vanlawng tampi cu thawn le let an si. US in United Airlines, Delta Air Lines le American Airlines zong Israel ah an zuang rih lai lo.
Israel PM Natanyahu nih October 7 ah “ral kan tho cang (we are at war)” tiah a chim i October 8 ah Israel cozah nih phungning tein ralthawh thanhnak (declare war) an tuah fawn. Hamas lei nih tutan kahdohnak hi timh ciammam tein kan tuah mi a si i pehtlai in kan tuah rih lai tiah an thanh bantukin Israel zong nih Hamas cungah fakpiin lehrulhnak kan tuah lai tiah an thanh ve.
Hamas nih Israel mi an tlaih mi hna hi 130 renglo an si i cu chungah ngakchia, nu le Israel ralkap zong an i tel. Cu hna cu Israel nih thong ah an thlak mi Hamas ralhrang hna he thlennak ah kan hman lai tiah Hamas nih an chim.
Iran hi Israel a hua biktu ram pakhat a si i tutan zongah Hamas hi a bawmh hna, a dirkamh hna. Afghanistan i US ralkap nih an kaltak mi hriamnam zeimawzat zong Iran kut in Hamas sin ah a phan tiah an chim.
Cu pin ah US le nitlaklei ram hna nih Ukraine an bawmh mi hriamnam cheukhat zong Hamas sin ah a phan mi a um i cucu thinphang ngai a si ko tiah Israel ralbawi pakhat nih Newsweek ah a chim mi cherhchan in Breitbart nih a ṭial.
Hamas kahnak ruangah a thi mi le hliatuar mi hna lak ah US rammi zong tam ngai an i tel nain a zat fiangin kan thei rih lo tiah US National Security Council (NSC) chimnak nawlngeitu nih a chim. Cun Hamas nih an tlaih mi hna lak zongah US rammi an i tel tiah UN ah Israel palai a si mi Gilad Erdan nih a chim.
Georgia ramkulh in US House of Representatives chungtel a si mi Mike Collins nih “Hamas nih America thinhunnak a tuar lai (Hamas will feel the wrath of the United States of America)” tiah Newsmax he biaruahnak ah a chim.
Raldohnak vanlawng tampi a phawrtu kho mi, vawleicung ah raldohnak vanlawng phawrtu nganbik ti mi USS Gerald R. Ford tilawng pi cu a herhning in Israel bawmh dingah Israel he aa naihnak Eastern Mediterranean ah a thlah cang.
Vawleipi hi a ngan a fak tuk cang, a temtuar ning a fak tuk cang. Baibal bia a tling chin lengmang ko.Sources: AP, NBC, Reuter, Newsmax, Fox News