Hakha Tualchung Mi 2 Le Mindat Tualchung Mi 2 Hna Cu SAC Nih Kum Caan Saupi Thongthlak Ding In Bia An Khiahpiak Hna!
Chinram kualipi Hakha tualchung mi 2 le Mindat khuapi tualchung mi 2 (An dihlak minung 4) hna cu SAC ralhrang nih kum caan saupi thongthlak dingin bia an khiahpiak cio hna, tiah SAC ralhrang thawng zamhnak Fifty two News nih nihin February 14 ah a langhter.
Mindat khuapi in Ling Khaw Ke cu dothlennak a tuahtu ralkap hna caah eidin pawl pekchanh, misual an si timi theih ko bu in report tuah lo, cozah rianṭuantu hna nih sualnak an tuah khawh nakhnga a bawmhchanh hna ruang ah Upadi Section 505-A(C) ning in thih hlan lo thongthlak ding, tiah SAC ralhrang nih bia an khiahpiak.
Cu bantuk ṭhiam in Mindat khuapi tualchung mi Salai Peter zong dothlennak a tuahtu ralkap phu sinah training a kai i cozah zung a simi Building pawl, humhimnak sakhan pawl le rampi ta a simi Building pawl cu faakpi in rawhhralhnak a tuah mi ruang ah Upadi Section 52(A) ning in thih hlan lo thongthlak ding, tiah SAC ralhrang nih bia an khiahpiak.
Cu pinah Hakha khuapi ah khua a sa mi Salai Ngun Lian Thang le Salai Van Chan Ceu hna cu dothlennak a tuahtu ralkap phu sinah training an kai i, anmah he an ṭangṭi tiin SAC ralhrang nih Upadi Section 52(A) in rianhrang le kum 7 thongthlak ding ah bia an khiahpiak hna.
SAC ralhrang nih hramhram in nawlngeihnak a laak hnu kum 3 chung ah Chin miphun chung in minung 1,000 leng an tlaih cang hna i mi cheukhat cu an thlah ṭhan hna nain cheukhat tu cu an hren rih hna. Tlaihkhih an ton lio ah a ruang tampi in a thimi Chin miphun minung 5nak tlawm lo an si, tiah ICA nih February 1 ah cathanh an rak chuah. Lungmili Post