Chin Ramkulh, Hakha Dawrhlun Sang Um Mipi Hna Cu SAC Ralkap Nih Khualleng Chuahnak Nawl An Pe Hna Lo. Chin ramkulh, Hakha Dawrhlun sang chung um mipi hna cu khualtlawn le khualeng chuah an duh tikah SAC ralkap le ṭuanvo ngeitu hna nih chuahnak nawl an pe hna lo tiah theih a si.
Sangchung ummi pakhat nih cun “kannih sang cu khualtlawn duh tikah sang dang bantukin kan chuak kho ti lo, kan chuah khawh lonak a ruang cu Dawrhlun sang kan si caah theihpinak ca an kan ṭialpiak duh lo, khualtlawn kan duh zong ah kan tlawng kho ti lo” tiah a chim.
Hi kong he pehtlai in a luancia January thla ah khan chungkhar cazin laaknak a tuahtu SAC kuttang um palik le Non CDM hna cu kah an rak ton caah palik 2 an rak thi. Hi ruang ah sangchung um mipi cung ah an ṭuannak hi a si ko.
Khualtlawn le khualeng chuah kan duh zong ah theihpinak le lungtlinpinak ca an kan ṭialpiak duh lo i khualeng zong kan chuak kho ti lo” tiah sang chung ummi pakhat nih The Chin Post ah a chim.
Hakha in Kalay, Mandalay le Yangon lei kal tikah khualeng in SAC ralkap gate hngak nih leilawng an check pin ah a chung cuangmi khualtlawng hna cu an phone le an thilri tibantuk cheknak an tuah hna caah khualtlawn aa timmi paoh nih kan phone tal hi cu i ralrin peng kan herh, a bik in khualtlawn kan i timh cang ah cun felfai tein thianh ta le zohfel ta a herh tuk tiah sang chung mi hna nih an chim.
Relchap- Tandaungkyi Kahdohnak Ah SAC Ralkap 8 An Thi. Karen ramkulh, Tandaungkyi peng ah rallam sialtu SAC ralkap hna cu kahdoh an ton caah khahlahyiah 604 in ṭatyinhmu Hein Zan Htun telh in SAC ralkap 8 an thi tiah People Defense Forces-Thandaung nih cathanh a chuah.
March ni 2, zinglei suimilam 8:5AM ah Botaekone khua pawng ah rallam sialtu SAC ralkap hna cu People Defense Forces- Thandaung nih an kahdoh hna caah 2 an thi.
SAC ralkap hna nih cun tualchung mi hna thirleng 5 an khanghpiak hna. Cu i kahdohnak chung ah cun tualchung hriamtlai phu lei in ralkap pakhat nih hliamhma a tuar tiah theih a si.
Cun, March 4 zinglei suimilam 11:40AM ah SAC ralkap hna cu sniper in kahdoh an ton ṭhan caah khahlahyiah 604 in ṭatyinhmu Hein Zan Htun cu sniper kahnak in a thi.
Chunhnu suimilam 1:15PM ah kaphnih kar kahdohnak a chuah ṭhan caah SAC ralkap lei in 5 an thi, bo thum rank ngei pakhat nih hliamhma fak a tuar tiah theih a si.
March ni 2 le 4 a cangmi kahdohnak ah khahlahyiah 604 in ṭatyinhmu Hein Zan Htun telh in SAC ralkap 8 an thi, bo thum rank ngei pakhat nih hliamhma fak a tuar tiah theih a si.TCP