German leh a thurualpui ramte chuan khawvela thuneihna zawng awng pumhmawm tumin sipai chakna hmachhuanin kum 1938ah Autria a runa, awp nghalin Czechoslovakia a run leh a hei mai hi duh tawk lovin Poland a run leh a.
An rahchin a piang an ram a nih avangin an hmaah chuan ram te deuh te chu khurin an kimki a. Anmahni hmachhawntute chuan German sipai chak tak chu dang zo lovin kut lukhumin an tlawm thu an au pui zel a. Ram ni tla seng lova roreltu kei ka ni in ti British tan chuan enliam mai theih a ni ta lo. Kum 1939 sept 3 ah Indo a puang ve ta a.
Asia khawmualpui atangin Japan pawh chuan hun remchang lo melh ve rengin milian (America) muhil kaihthawh nan an lawng chawlh hmun Pearl Harbor chu 7th December 1941ah thapui thawhin Isoroku Yamamoto a ralrelna hnuaiah Imperial Japanese Navy Air Service te chuan thapui thawh tak meuh meuhin an han chhu ta thut mai a.
He thil avang hian America thalai tan chuan ral do tura kohna dar a rawn ti ta vang vang mai le. I hear the sound of bugles blow Far away, far away And if they call then I must go Across the sea, so wild and grey ( Distant Drums, Jim Reeves)
Chu raldo tura kohna chuan pianphunga rual ban lo leh tar chak lo tak an nih ngawt loh chuan inhmangaihte duat tak leh inthlahlel taka tanga an in pawmlai pawh ni raw sek sek a indona mualah a khalh liam tho tho dawn tih hi a chiang reng mai.
Raldo tura kohna lehkha chuan thalai tawh phawt fuke kima piang mi ang pangngai tawh phawt chu a ko zel a. Jack-a pawh chu nupui nei thar hlim ni mahse a koh loh phah chuang lo. Innei hlim an nih avangin chu lehkha an han hmu chu an nupa an in pawm chawt a. An hmabaka awm an tawn ngei ngei tur “Inthenna” chu an huphurh mang teh tak e.
“Jack, i kal dawn si a maw.? Ral ramah chuan va tluhlum ta la engtin nge ka awm tak ang.? “Maggy, ka ramin min mamawha kohna chhang lo thei ka ni lo” “Ka van hmangaih ngawih ngawih tak che em.! Damin lo haw leh ngei ngei rawh aw” “Duhtak Maggy ka lo haw leh ngei ngei ang tih ka tiam a che” Maggy mittui chu a luang ngiai ngiai a. Jack a chuan duat takin a hruk hul sak a.
Rel Stationah chuan rel a kiu ruai ruai a, sipai lak thar leh an chhungte, an thiante leh ngaihzawng chu indin chilh in an ri luai luai a. A then an insulpel zut zut a. Pa pakhat chuan “ mipa fa i ni a lawm, i ram tan i pen chhuak dawn a huaisen tak leh fim khur takin aw” tiin a fapa a chah a. Chu December zing nichhuak sarah meuh zawng nu a fa te thlah avanga mittui tla per pur te, nula ngaihzawngte ngaih avanga inhup chawi chawi chunga insutfeih feih hmuh tur an kat nuk e.
Platform remchang laiah chuan “Maggy ka kal ngei a ngai a ni. Rinawm takin lo awm rawh aw.”“Jack, i nupui ka ni a, hetah (a thin zawn a khawih a) hian ka lung a phut chhung zawngin i awm reng ang” tah hmuam teuhin a ti a.
Jack a chu a rum nghut a, “ raldo tura kohnaah hian ka kal ngei a ngai si a. Nang he tah i lo awm a ngai si” tiin a nupui duhtak Maggy chu a kuah vawng vawng a. A ngaihtuah phei zawng hriat a ni lo. I hear the sound of Distant Drums, Far away, far away And if they call for me to come Then I must go and You must stay.
Rel chu a kiu ruai ruai a, rel tukverh remchang leh kawngkhar atang chuan lu hlir hi a rawn lawr chhuak a. Eng tikah tak an hmangaihte chu hmu leh ang maw tiin an ban an vai lap lap hlawm a. Maggy pawh chuan a rawmawl var phawrh chhuakin a vai phe ve hlap hlap a. When the train pull out the whistle blew With a long and a lonesome moan.Ral rama hmelma va hmachhawn tura kal nge lo nghaktu rilru pik zawk ang le.?
Philipines ram a thliarkar pakhat Luzon thliarkar chu Japan sipai bubitin an luah khat hmuk mai a. Kum 1945ah chuan hmunpui lam atanga thu rawn kal angin US Marine Force te chu chu hmun Luzon luhchhuah a Japan Sipai zawng zawng te thenfia hna thawk tura tihna lehkha a rawn thleng a. Chu hmun luhchhuak tur chuan Jacka te Batallion pawh an tel ve a.
“Thliarkarah chuan kai u la, hmelmate chu va chimih rawh u” tih hi an thupek dawn chu a ni. Anihna takah chuan sipai hotute pawh chuan sipai batallion tlem te lekin chu thliar kar chu an luhchhuah theih an ring tak tak lo a.
Japan sipai te chu an inkulh nghetin lei hnuai thuk tak takah kua hrehin tan hmun an rem a. Chung an tanhmun te chu thlawhna hmang leh tuifinriat atanga ni eng emaw zawh an bomb hnuah pawh an bunker tam zawk chu an tichhe hleithei lo a. Chuti chung chuan US Sipaite chuan thliarkar chu lak an tum tho si.
US Sipai huaisen tak tak te chuan Indo lawnglian atangin lawnglengah an pakai a, lawngleng atangin vaukamah an kai a. Japan Sipai chuan puakrang silai leh bomb in an lo hmuak a. A kai hmasa te chu an lo mang deuh thak a.Ka tum nge ruh saruh.
Lawngleng hmanga kai luih tumin lawngleng za tam hmangin Marine te chuan thliarkar an rawn kai a, puakrang a ri zawih zawih a, a bass ni ve awm hringin bomb a puak ulh ulh a. Na tuar mangang te thawm leh anchhe lawh bawrh bawrh thawmin thliar kar chu a khat a.Marine te chu an tlu phawk phawk a. Pasaltha ruang hmun tinah a tlu kawkalh nei nuai a. Thisen a luan tak meuh meuhin a luang a.
Harsa takin General Douglas Mc Arthura leh a hote chuan Luzon thliarkar chu an la hram a. Japan sipai nuai hnih vel zet thiin US Sipaite pawh ni singkhat vel an thi a. Chin hriat loh tam takin an bo bawk a.
US chuan Japan khawpui pahnih Hiroshima leh Nagasakiah Atomb bomb thlakin Japan chuan loh theih lohin an tlawm thu an puang ta. Chutia an do te ber an tlawm takah chuan US sipaite pawh an ram lamah an kir ve eh ta a. Jack in lo hmu em.?
Pasaltha rammu haw te chu US mipui ten lo hmuakin a then lawm taka in pawmin an inkuah vawng vawng a, lawm avanga a then an tah rawi rawi laiin a then erawh an hmangaih an chan avangin lungngai takin an rum kawk kawk a.
Maggy pawh chuan a hmangaih Jacka chu a nghak ve ngei a lawm. Luzon Indona hmun atang khan tumah rengin Jacka chanchin reng an hre zui si lo. Maggy chu pasaltha te lo haw niah chuan Lungngai taka van ruai ruai chungin a au vak vak a, a beidawn tawpah a thu hnawk a. A mittui a tla a.
Indona boruak a reh fel tawh a. Japan tlawm atanga kum 3 hial a vei tawh em e. Bus pakhatah hian Marine thawmhnaw hlui tawh lam ha hian pa pakhat chu a thu ve ran a. A bek vei lam chu bomb perna hnu niawm takin a kheng rul a, a beng a awm lo va, a mam pur a, a hmaiah chuan ser hmuh nawm lo tak mai a in phan chek chuk a. Bus hnung ber nghenchhan ngheng chuan a thu awn diai a. A ngaihtuahna chuan nunhlui a chhui a.
“Jack, i lo haw leh thleng ka lo nghak ang che titu a nupui duhtak Maggy a ngaihtuah kai a. Zawhna tam tak a nei a ni, heti chung hian a nupui hian a la pawm leh thei ang em.? He zawhna amah leh amah a inzawhfo chhanna a hriat si loh chhanna nei tur hian an in lam chu a pan a ni.
Bus chu a ding dat a, muang changa chhuk taih taihin bomb in amah a sawisakna avangin a ke chu a bai deuh a. A thawmhnaw neih fel taka a tel chu a ak a, Bus atang chuan a chhuk ta. Conductor chuan hmel hlim tak hian “Thanks for your service” tiin a thlah a. Ka in tia a lo sawi ve thin lam pan chuan a bai saih saih a.
An in kawngkhar chu kik an tum a, a lo inkalh miah lo. Ama in a ni miau a, in thlahrung lem lo takin a chhungah an lut a, tumah hmuh mai tur an awm lo. A reh deuh thiap a. In chhungah chuan a pen lut ril zel a. An mutna khum ngei atang chuan hlim taka nui awr awr thawm a hria a.
A nupui duhtak Maggy chuan amah a ngaih em avangin rilru thlenga rualban tawh lovin a awm em ni.? chu thleng chuan a ngaihtuah kai hman a. Mahni in khawngaihna leh hmangaihna dah bo vin a nupui a hmangaihna leh a khawngaihna chu a zual sauh a.
Kawngka chu dim te a hawngin a bih dek dek a. Sipai a ni, ral do mi a ni a, mi tam tak thi lai a hmu tawh thihna ringawt aia rapthlak hliam te pawh a lo hmu tawh. Chu a khumpui a a thil hmuh aia hmuh hrehawm leh en hrehawm tih hi a la tawng ngai lo. An khumpui ngeiah chuan a nupuiin mipa dang a mutpui lai a va hmu ta tlat si.
A bianga mittui luang chu dan kir a tum a, a dang kir zo lo. Hliamna tak tuar chunga a nupui avanga dam a tum hram hram lai a ngaihtuah kir a. Kha indona naah khan lo thi ve zawk i la aw a ti vawng vawng a. Muang changin kawng khar chu a khar riai riai a. A in her a. A kal chhuak ta.
A thil hmuh theihnghilh tum chuan zu a in ta fo a, a in zel a, a in tam tawlh tawlh a. Eng emaw chang chuan a theihnghilh ve mah na.
Engtin awm ta zel ang maw.? (Tukin zing ka tho chu Whiskey Lullaby kha ka ngaihthla a, ngaihtuahna tla darh tak kan pawt khawm mai mai a ni. In duh duh danin lo awm tir mai teh u.)