CNA/F Chimnak Nawlngeitu Salai Htet Ni He Biaruahnak. Biahalnak : East Chinland le Central Chinland Mizoram he zei ti’n kan i pehtlaih ah a that lai?
Salai Htet Ni: Kan nih CNF nih cun Chin miphun hi ramthum ah kan um kan ti. India ram ah a ummi Chin miphun, Bangladesh ah a ummi Chin miphun, Myanmar ah a ummi Chin miphun tiah ramthum ah kan um.
Cuticun International Border nih a kan then, zeitluk in kan then hmanh sehlaw kan lungthin hi pakhat siseh ti kan duh i a si zong a si fawn. Tu ah kan ram a chia Mizoram ah kan zaam, anmah zong MNF chan lio ah kan ram ah an rak zaam ve ko. Bangladesh zong East Chinland ah an ra. Tha te’n i pehtlaih khawhnak ding ah India Chin miphun le Bangladesh Chin miphun cu chia rih ko usilaw.
East Chin miphun kan ramkhel nih zei ti’n dah an ram he pehtlaihnak kan tuah khawh lai ti kan i zuam a hau. Hlan lio ralkap uknak a fah lio ah Mizoram he pehtlaih an kham. Tu ah kan duhmi Chinland si khawhnak dingah dohthlennak kan tuah i kan duhmi Chinland a si khawh ah cun, India ram Chin miphun, Bangladesh Chin miphun he pehtlaih a tha lai.
India Centre nih cun ralzaam ti bantuk a cohlang lo, kan unau Chin miphun an that ruangah hmailei chungkhat pehtlaihnak caah an kan cohlan, an ram ah kan um kho nihin tiang. Thailand bantuk an si lo. Asinain i pehtlaihnak tha deuh kan ti ah cun kan ram hi, zei ti maw in hi nak in a thancho deuh a hau. Ramkhel lei in nawlngeihnak tam deuh zong State Level in kan ngeih a hau.
Biahalnak : Saisihchuak lam hi tlamtlinh sisehlaw hmailei ah zei tluk in dah Central Chinland le East Chinland a thancho hnga? Saisihchuak lampi hi East Chinland caah a biapi maw?.
Salai Htet Ni : Saisihchuak hi kan nih East lei Hakha, Thantlang le Central lei Lawngtlai le Siaha lei i pehtlaihnak ah a biapi taktakmi a si, Champhai lam lei nak in a biapi deuhmi a si. Sul le lam ruang ah Lawngtlai ummi Lai, Siaha ummi Mara lei le East lei i pehtlaihnak hi a um kho tuk lo, a ruang cu Champhai lei lam bantuk a si rih lo caah pehtlaihnak a har, hi Saisihchuak lam hi tha sehlaw, Kalara Project khi vialte hna he aa pehtlaih dih caah tha te’n tuah kho sehlaw, i pehtlaihnak, chawlehnak ah a biapi taktak dingmi zong a si.
Chin State Chief Minister Pu Hung Ngai zong a lung ah a um tukmi a rak si. Mizoram kan upa hna zong an lung ah a um. Harsat caan ah eidin laknak ca zong ah a biapi mi lampi a si caah dongcat lo in tawlreltu nih kan tawlrelpiak hraam hna sehlaw ti ka duh. The Lairam Times