1. Abraham nih a pek caah
Abraham cu zumhnak ah kan pa asi (Gal. 3: 6-9). Cucaah Abraham nih a tuahmi thil ttha cu kan i cawn awk asi. A zumhnak cu peknak in a langhter. Abraham bantukin zumhnak ah puitlingmi si a duhmi nihcun cheuhra-cheukhat in kan langhter ve awk asi. Aho fial loin kan pek awk asi. Cheuhra-cheukhat pek cu Abraham zumhning in Pathian kan zumhnak kan langhter ning phun khat asi.
2. Jakop nih a pek caah
Jakop nihcun Bawipa eidin awk na ke pek i, fenheih awk na ka peek i ka chungle he dam ten na ka ton ter tthan ahcun cheuhra-cheukhat kan pek lai a ti (Gen. 28: 20-22). Zumtu hna zongnih Jakop nih thil ttha a tuahmi nawl cu kan i cawn awk asi. Kan I cawn awk ah an tuanbia cu ttial an si. Bawipa! Khrih in na ka tlanh i ka sualnak vialte na ka ngaihthiam, na ka khamh, thluachuah rel cawk lo na ka pek, Vanram cu ka caah ready in na ka chiah piak cang caah cheuhra-cheukhat cu kan pek ve kan ti ve awk asi.
3. Cheuhra-cheukhat cu Bawipa ta a si caah
Cheuhra-cheukhat cu Bawipa ta asi (Lev. 27: 30). Jesuh nih Caesar chaw cu Caesar kha pe ulaw, Pathian ta cu Pathian kha pe ko uh (Mk. 12: 17) a ti caah cheuhra-cheukhat cu Pathian ta asi tiah Bible nih a ti ko caah Pathian cu a ta asimi cu kan pek awk hrimhrim asi.
4. Pathian mi lianngan vialte nih an pek caah
Abraham nih a pek, Jakop nih a pek, Moses nih a pek, David nih a pek, Solomon nih a pek, Jesuh nih a pek, a zultu hna nih an pek (Jesuh nih pe hlah selaw, misual asi ve hnga), Jesuh chan lio minung nih an pek. Cucaah, kanmah zong nih kan pek ve awh hrimhrim asi.
5. “Pe ti hlah uh, maa cang uh” timi Bible cacang a um lo caah
Biakam Hlun ah an rak pek peng, Jesuh chan lio ah an rak peek peng. Asinain, pe ti hlah uh timi biafang Jesuh le zultu hna nih an chimmi a um lo. Zumtu hmasa hna an lo an rak zuar i sifaak an bawmhmi hna kha cu cheuhra-cheukhat an peek pin ah an tuah chapmi asi. Phun dang in chim ahcun cheuhra-cheukhat nak tam deuh an peek caan te khi a chim duhmi asi.
6. Cheuhra-cheukhat locun Khrihfabu a nun khawh lo caah
Jesuh a rat chan cu Khrihfabu dirh ah asi. Jesuh cu Khrihfabu caah a thi. Thiang Thlarau a rat chan cu Khrihfabu dirh ah asi. Thawngtthabia kan chim cu Khrihfabu karhnak le ngandamnak caah asi. Cheuhra-cheukhat kan pek cu Khrihfabu ngandamnak le nunnak caah asi. Khrihfabu pakhat ah thawhlawm Sunday i an khawlhmi cu Kyats. 200,000 lawng a chuah.
Cheuhra-cheukhat cu 5,000,000 (Sing sawmnga) a chuak. Khrihfa nih cheuhra-cheukhat kan pek ti lo ahcun Khrihfabu cu a thi. Cucaah, kan pek awk hrimhrim asi. Thawhlawm khawlhmi lawngcun pastor pakhat lahkhah lawng a daih cu a fiang.
7. “Biakam Thar ahcun a tam khawh chungin kan pek awk asi” a timi hna nihhin a taktak ahcun an pek taktak lo caah
Mi tampi nihcun Biakam Thar Khrihfa hna cu kan sian zat poh, kan peek khawh chungin kan pek ding asi tiah an kan cawnpiak ko nain, a taktak ahcun kan sian zah poh an timi khi cheuhra-cheukhat a tluk nemmaam lo.
Khakha cu cheuhra-cheukhat an peek hnu ah kan tuah chih awk khi asi. Kan sian zah cio hincun pe usih law, Khrihfabu cu a thi hrimhrim. Kan sian zat kan timi hi a tlawm tuk. Cucaah, cheuhra-cheukhat hicu kan pek hrimhrim lawngah church cu a nun khawh caah kan pek hrimhrim awk asi. Cun, Bible ning zong asi.
Cheukhra-cheukhat cu Pathian sinah kan peek dingmi minimum amount asi. Kan pek thlu khawh lo zongah kan i zuam ding asi. Ahohmanh nih tling khitkhet cun an pe thlu kho cio lai lo. Asinain, an i zuam. I zuam ve hna usih!
Cheuhra-cheukhat pek cu Jesuh nih vailamtah ah a donghter cang timi cu ka cohlang kho lo. Zeicatiah cheuhra-cheukhat pek cu sualnak tuah asi lo, sualnak in a rami asi lo. Hmuhlei nakin peklei ah thluachuah a um deuh a timi kan Pathian nih cun thil ttha tuah cu a kan maak ter nak ding a sullam ka thei lo. Dr. Aung Myint Thang