New York sual/nawl buar biaceih zung ah president Trump le a team hna cu a rat hnuah a umnak Florida i a inn ah a phan than cang. Dirkamhtu hna nih a inn khat in an rak thut pi.

Biachimnak zong a ngei i President aa cuh kaa in nihin tiang Democrats pawl nih dohnak le a sual an kawl vialte a chim dih. An chungkhar temtuarnak vialte zong a chim. A fale cung i aa lawmhnak zong a chim.

Tu zan cu pacan aa cuh chih i a si ko. A mithmai a panh kho lo, a lungthin a kuai ngaingai timi fiang tein hmuh khawh a si. Ram a dawtnak nih a bei a donghter lomi a lang ngai fawn.

A donghnak ah Russia le Taluk thancho thluahmah lioah US pi tumchuk leiah kan panh cang. Taluk hruainak in aa rem bal lomi Saudia Arabia le Iran zong daihnak an tuah cang tiah a lungfak ngai in a chim.

World Order aa thlen chuah lioah US cu a thurhnomhnak le tumchuknak leiah kan panh. Joe Biden le a hruaimi Cozah nih US pi an hrawhmi vialte hna hi US president a rak tuan balmi minung panga nih US cungah hrawhnak an tuahmi vialte fonh u sih law an tluk lai lo a ti.

Cu tluk cun Joe Biden hruainak tang i US a rawh le tumchuk hi a zualhma ngai ko rua. Tu chun i biaceih zung an kalmi cu, a hlan ah Grand Jury nih, Trump nih nawlbuar sualnak a tuah ko tiah vote an rak thlakmi on le theih ah an kalmi a si.

A karlak ka vun tenh ta lai, US upadi ah a ummi cu Grand Jury nih sualnak a hlat i vote a thlakmi kha thlithup thil ah chiah le ruah a si. Biaceih zung lawng ah biaceihtu nih on (unsealed) tuah i a sualmi sinah relpiak a si.

Cuticun a sualmi pa nih a ngaih i a sual ko ahcun ka sual ko tiah biaceihtu sinah a ti. A sual lo ahcun ka sual lo a ti i zung ah a caan a khiahning in chuah i tei or sung hlan tiang fight a si.

Asinain tu tan Trump sual kawltu pa Attorney Alvin Bragg nih nawl a buar ve ti a si. Trump sual an kawlnak le a case an serpiakmi zat vialte kha biaceih zung i on (unsealed) a si hlan ah media nih an theih dih cang.

Alvin Bragg a si lo ah cun Jury chungtel nih an chuahter (leak) i a si tiah an zumh. Hi bantuk nawlbuar hi kum 5 tiang thongthlak khawh an si ve. Alvin Bragg zong a sualnak hlat awktlak dirhmun ah a um ko ti khawh a si.

Cun Trump cu biaceih zung a phanh cun a case vialte cu an relpiak dih. Dantat awk tlak in nawlbuar sualnak 34 na tuah an ti. Pakhat nih hin kum 4 hrawng thong a tlakter khawh ti a si i, 34 nih cun kum a tamter ngaingai lai.

Asinain Trump nih ka sual lo a ti hna. Cucaah ka sual lo a ti caah dan a tat dingmi kong pakhat hmanh an khiahpiak lo. Ka sual lo tiah a fight khawh chung a fight hna lai i a vanthat ahcun a tei dih lai.

A tei dih thlu khawh lo ahcun a tei dih thlu khawh lomi zat in dantat a tuar te lai. December 4 ah a voikhatnak an va fight te lai. President cuh caan a si cang lai caah a dawn te lai maw? President aa cuh kho ko lai. Thong hmanh thla hna seh law thong chung in President a tuan kho ko lai.

Tu tan Trump an tuahto ning cu a fak ngaingai. Trump a huami lila le Trump a rem lomi hna hmanh nih fak tuk in Alvin Bragg thiltuahmi an doh dih. Trump tanhtu hna ca le ram dawtu hna ca chinchin ahcun celh ding a si lo.Remh awk tha lo tiang US cungah hrawhhralnak a tuah an ti. Tawite in ka vun tial ta. Luther Tin Hre

By admin

Leave a Reply

Your email address will not be published. Required fields are marked *