Hriamtlaih in dohthlennak caan kum 2 a luan lengmang cang nain ramchung ramleng Chinmi vialte thazaang chuahnak a dor hin lo a țhawng chinchin tiah Chin National Army, Colonel Solomon Thang Ding nih a chim.
” Dohthlennak a hun chuah in Chin miphun dihlak, upa ngakchia hrelh lo in CNA le CDF ah an thazaang an bungh, tahchunhnak i chim ah cun a hramthawk i Dollar 100,200 an pek nain a hnu ah cun Dollar 5000 an pek.
Cu dirhmun tiang kan phanh caah, keimah nih ka hmuh ning ah cun CNA le CDF cung i thazaang an kan peknak a dor hrimhrim lo” tiah a chim. Tu bantukin zapi nih thazaang an chuahnak an hmuh tikah ralhraang nih zapi cungah hruhru hraanghraang in thil an tuah.
” Zapi nih ralhraang phur, tei khawh an duh, hi ralhraang hi hiti ning in zoh sawh awk an tha nenmam lo, chiah awk tha zong an si fawn lo. Zei ram kan phanh zongah tutan kan tei lo ah cun kan rampi le mino an hmailei lamthluan a lotlau lo ti hi zapi nih an i fiang ngaingai caah thazaang a tlung ngai ngai ko, hi dohthlennak ah hin zapi he i teltum a si caah tei lo nak ding pakhat hmanh a um lo ” tiah a chim chap.
Khuapau dohthlennak hlawhtlinnak ding caah CNA telh in East Lairam chung dohthlennak thazaang hmunkhat ah fonh in, minung thazaang, chawva thazaang, hriamnam thazaang in zapi nih kan dirkamh hraam ko u tiah Colonel Solomon Thang Ding nih zapi sinah forhfialnak le sawmnak zong a tuah chih. TCJ