Demoso Peng Ni Hnih Chung Kahdohnak Ah SAC Ralkap 16 An Thi, Hriamthil Zeimawzat An Chuh Hna. Karen ramkulh, Demoso peng Dawlyiakhu khuapawng ah SAC ralkap le Karenni ralkap phufonh kar kahdohnak a chuak.
Cu kahdohnak ah cun SAC ralkap lei in 15 an thi, hriamthil tiah KNDF in chimphuannak nawlngeitu nih March ni 31 ah a chim. March ni 29, in Dawlyiakhu (ဒေါလျာခူ) khua pawng ah rallam sialtu SAC ralkap khahlahyiah 287 hna cu KA, KNDF battalion 10, KNDF battalion 15 le battalion 07 phufonh nih an kahdoh hna caah kaphnih kar ni hnih chung fak ngai in kahdohnak a chuak.
Kaphnih i kahdohnak ah SAC ralkap lei in a thimi le hliamhma tuar an tam, tualchung hriamtlai phu lei in hliamhme tuarmi zeimawzat an um ve tiah theih a si. Kahdohnak chung ah SAC ralkap 15 nak tam an thih pin ah hliamhma tuarmi an tam.
SAC ralkap sin in MA-1 meithal pathum, MA-2 meithal pahnih, MA-3 meithal pakhat le zeidang hriamthil zeimawzat tualchung hriamtlai phu nih an laak tiah theih a si. Rallam an sial hi March ni 8 in a si cang caah a caan a sau cang, Dawlyiakhu (ဒေါလျာခူ) khua pawng Ngebukhu (ညေးဘူးခူ) tlanglei ah rallam an sial caah kanmah lei nih kan kahdoh hna.
March 30 ah kaphnih i kahdohnak um loin Dawlyiakhu (ဒေါလျာခူ) khuatlang in hriamngan voi 10 hrawng an thlah leng ah raltuknak vanlawng nih bomb a thlak caah tualchung mi pakhat a nunnak a liam. SAC ralkap hna cu hnu an tolh rih lo caah kahdohnak a chuak ṭhan khomi a si” tiah KNDF in chimphuannak nawlngeitu nih a chim.TCP