Ngaih Chiatnak Thawng! Dallas Texas khuasa, Rev. Elvis Buai (Vuangtu) “Kum-47” nih chungthin lei damlonak in, October 10, 2023 ah mual a kan liam tak ti thawng kan theih.
Ngaihchiat a tuar mi Chungkar, Khuami, Khrihfabu le hawikawm dawt vialte Bawipa Pathian tu nih in-tuar khawhnak thazaang in pek hna sehlaw, a dawtnak in, in hnem hram ko hna seh. Nan ngaihchiatnak kan in hramwmpi hna, Zophei Community of America (ZCA)
Relchap- Pastor Le Ngakchia Hna Telh In Chin Miphun 528 Cu SAC Ralhrang Ruang Ah An Nunnak A Liam. SAC ralhrang nih nawlngeihnak a laak in kum 2 le cheu renglo 2023, October 1 tiang ah SAC ralhrang ruang ah Pastor hna telh in Kawlram pumpi huap Chin miphun hna chung in minung 528 an nunnak a liam cang, tiah Institute of Chin Affair (ICA) nih October 10 ah cathanh a chuah.
Nunnak liammi Chin miphun hna cu Chin ramkulh chung le Kawlram pumpi kakip ah khua a sami hna mincazin kan laak mi a si i SAC ralhrang a dohtu Chin mipi ralkap hna zong an i tel chih, tiah an langhter.
SAC ralhrang hriamngan kahnak, cunglei kahdohnak hna le vawlei chilhmi bomb lamsualnak, tlaihkhih in an hrem hna ruang ah mipi nu 38 le pa 179 (An zapi fonh) minung 217 tiang an phan, tiah an langhter.
Cu chungah kum tlinglo ngakchia nu 4 le pa 20 (An zapi fonh) minung 24 an i tel i Pastor 5 hna le khrihfa upa 3 zong an i tel chih, tiah theih a si.
Nunnak liammi minung 528 chungah SAC ralhrang a dotu Chin mipi ralkap hna chungtel nu 15 le pa 296 an si i an zapi fonh minung 311 nunnak a liam. SAC ralhrang ruang ah Khrihfa biakinn hna telh in biaknak lei he aa pehtlaimi inn 101 a rawk i mipi inn 2,100 leng zong a rawk chih, tiah an langhter chih.
Ralhrang nih nawlngeihnak a laak hnu in Kawlram pumpi huap kahdohnak ruang ah khua chuahtak in a zaammi minung sing 100,000 leng an phan i India, Mizoram ramkulh chungah minung 60,000 tluk deng an i dor hna, tiah Institute Of Chin Affairs(ICA) nih cathanh an chuahmi ah an langhter chih.