CNO/CNDF humhaknak hmun chung ah April 28 zan suimilam 9 tluk ah mipi thithruainak Palik le CNDF i bawm in BE zuu Pipa 5 an tlaih hna tiah palik tuanvo ngeitu pakhat nih a chim.
“CNO humnak nak chung poah ah rithaisii zuar khap a si. Khua kip ah thawngthanhnak zong tuah dih a si. Kan kham mi chung ah a zuar mi cu tlaih an si ko” tiah a cunglei upa nih a chim.
Tutan an tlaih mi BE Zuu hi ramlak ah an chiah i a ngei tu zong upadi ning in biaceih zungah chuah pi a si.
“Kan tlaih mi hi a tulio thilman in Pipa pakhat ah Kyats sing 11 tluk a si, Pipa 5 a si caah sing 55 tluk man a si hnga. Rithaisii doh le khamnak kongah mipi zong nih an kan bawmh a herh” tiah CNDF AGSO nih a chim.
Falam peng chungah rithaisii doh le khamnak rian cu Biaknak lei, mino le zatlaang bu hna i bawm in fak piin an kham tiah kan theih.
Khualtlawng Motor Le Thilphur Motor Pahnak In Minung 2 An Thi 5 Hliam An Tuar
Sagaing ramthen ShweBo le Mandalay motor lampi ah khualtlawng motor le thilphur motor cu hmaitonh in an i pah caah minung 2 an thi i 5 hliam an tuar tiah kan theih.
April 28 zanlei suimilam 6 tluk ah Hla-daw khua lamkuai zawn ah khualtlawng cit mi motor le favai phur mi motor an i pah hi a si.
“Pakkuko lei in a ra mi khualtlawng cit mi motor le Favai phurmi motor an i pah. Khualtlawng motor cungah hin minung 9 an cuang i Hpakanh khua lei a kal ding an si”tiah ShweBo khua mibawmchan tu pakhat nih a chim.
Atu lio ah ShweBo le Mandalay motor lam cung ah kahdohnak a chuah lio a si caah khua mi hna zong ralzam in an um lio a si tiah kan theih.