Biahalnak: Zeiruangahdah Laimi hi thlachiat kan ruah? Salai Htet Ni: Laimi thlachiat kan ruah timi hi chim ko ah cun hlan lio ah inn le lo kan ngei ko nain Lo an kal ah maw zei an tuah ah maw innka hrenh timi a um lo. Fir zong a um lo, an i fir piak bal lo, cu bantuk nunphung te cu kan ngei.
Khrifa kan si hlan ah thlachiat ruahnak pakhat le pakhat i dawtnak a ngei ciami kan si i, Khrihfami kan ram i an luh tik kha kha kan i nunpi chih i. Laimi cu kan thangcho lo kan fingtlang aa dang lamhla pipi ah kan um hi nih hin kan holh te hna a danter, asinain kan i chuahpi chihmi thlachiat ruahnak kha Khrihfa kan sinak zong ah kan i nunpi.
Laiholh in khuaruahnak ” Khua ” timi cu khua kan saknak sawhsawh hi a si lo. Khua timi hi a thuk taktak mi a si, miphun dang holh nih an ngei lo, cu ”Khua ” ah cun zeidah a ra ” Khuazing ” tibantuk hna kha a ra. Kha bantuk hna kha thlachiat ruahnak chung ah aa telmi biafang pawl an si ko lo maw tiah ka ruah. Biahalnak : Chin hrinsor vialte i funtom khawhnak ding ah zei hi dah a biapi bik in na hmuh?
Salai Htet Ni: I funtom khawhnak kan ti tikah funtom khawhnak hmanh si rih lo in, Kan Chin miphun nih Tlangholh kan ngei lo, mah le holh cio in kan holh, micheu nih kei cu Laimi ka si lo, kei cu Mara mi ka si lo, kei cu cucu ka si kan i ti, kan holh a dan caah cu vialte cu a chuak. Kan fingtlang ai dang, khua khat le khua khat kan i hmu bal lo, kan thinlung a hlaat chin chin, a hnu ah a chuakmi cu kei cu, cu miphun ka si timi a chuak.
Tlangholh kan ngei kho lo, cu pawl silhnalh khawhnak dingah kan ram hi thangcho seh, kan ram hi thangcho seh ka ti duhnak cu, East Chinland thlanglei bik ah Paletwa, chaklei bik ah Tonzang peng hi ahhin thla 12 chung a kal kho dingmi motor lam um tuah seh, khuakhat le khuakhat pehtlaihnak lam um tuah seh, tu ah cun Paletwa in Hakha rat duh tikah Arakan lei in rat hau, dengteo in ratnak a um lo
Paletwa nga hi chaklei ah a kai khawhnakhnga pehtlaihnak lam um sehlaw kan i naih chin ko lai. Kan i naih ah cun, Tlangholh ah kei nih Mara holh in ka holh lai, nang nih Laiholh na holh lai, kan i theih veve ah cun hi nih i funtomnak a sersiam lai, cu i funtomnak a sersiam khawhnak dingah kan ram hi a thancho a hau. A dang tampi lak ah hihi a thahnem ve ko lai tiah ka zumh. The Lairam Times