CNDF Nih Satawn Khuami Siasa Can Piak Kong Ah Khuami Nih A Voihnihnak Cathanh An Chuah. Nai teah Media cheukhat ah kan hmuh bantukin sia kongkau ah Satawm khua zapi le CNDF ralkap i remnak kong thanh a si. Lunglawmh awk ngai ah kan ruah.
Lungtha in kan um lio caanrau lo ah CNO/CNDF Spokesperson Peter Thang nih media ah Satawm khua zapi dohkalhnak bia a chim caah mi tampi nih Satawn khua cu dohkalh cio a si. Zapi nih biadik an theih a hau tiah kan ruah caah Global Satawm Union nih cathanh kan chuahnolh a si. Hi Sia kongkau hlei ah biadang a chimmi lakah biapi ah ruahmi lehnak kan langhter lai.
1) Sia pahnih thih kongkau ah biadik cu hitihin a si. CNO/CNDF Spokesperson Peter Thang nih, Satawn khua upa hna phone in kan chawn kho lo, kan naule sinah sia sa cu can ko u tiah kan ti hna, ti kha cohlan awk tha lomi a si. An naule phone a luh khawh ko cun kan khuami phone call khawh si lo cu a mak ngai. Satawn khuami zapi hi zawnruat hna sehlaw cu an camp le kan khua hi kilometers cheu hrawng lawng aa hlat.
Sia sa cu an can, an ralkap camp ah an phurh, vanchiat ah sia sa an phurh hi khuami nih an hmuh, rak hmu hna hlahsehlaw cu sia pahnih thih kong hi kan thei lai lo. A nihnihnak Hniang 20 tiangah an hmurka im lo caah Satawn khuatlang hruaitu nih Global Satawm Union, Mizoram sinah an theihter i, Satawn khua zapi lungtlinpinak he cathanh chuahmi kan si.
2) Tuibual ralhraang an camp leng chuak kap bantukin an chim hi lih hrokhrawl a si. Satawn khuachung zapi nih meithal puah cu kan theih, sinain ralhrang lei hriamngan le meithal puah thawng kan thei lo. Kaphnih i kahnak siseh law cu ralhraang nih an kah ve hrim hna lai. Sia pahnih kha bomb lamh in puahhnawhmi ruangah thi an si ti ruah khawh a si. Sia sa zaangram ruangah hmualpho timmi kan si lo.
Vulei cung zapi theih dingin media i biachimnak ah kan khua zapi nih kan zohkhenhnak hna ah lunglawmhnka bia kaakhat hmanh chim duh tung lo, kan khua pawng i camp an neih ruangah khuami tuarnak vialte media ah voikhat hmanh kan langhter lo kha lawmh awk i kan ruah lio ah kan cung i an khuasak dan hi tuar a har ngai. Kan temtuarnak vialte tial cu silo nain cheukhat cu langhter ve hrimhrim a herh tiah kan ruah.
3) 2021 Hniang 16 ah kan khuachung zapi lakah ralhraang le CNDF an i kap. Kan tihtuk caah thlaulau in ramtang ah kan zaam, cheukhat cu Mizoram Saikhumphai ah an zaam. A hnu raulo te kir kan i timh ah ” Rak kir rih hlah u, a dai rih lo” tiah an kan ti lengmang.
Kan khuami kan um lo karah kan inn lo an kan ven piak rua lai tiah inn zeimawzat an hrawh dawr an hrawh cu chim lo, Biakinn le Khrihfabu quarter thil solar le Battery hna, Pastor quarter thilri hmanh an laak ngam. Cu hlei ah kan sațial, vok, ui le ar zong an thah menmem ko hna, kan tisik-anhnah hoi cu an thianh dih. Cu bantuk i an cawlcangh ko lio ah zapi ralkap kan bawmhchanh khawh hna tiah kan i ruat, dai diamdiam in kan um.
4) Kan ralzaamnak in khua kan kir hnu zong ah kan duhnak tel lo in khuachung ah an kan umhnawh. Anmah ruangah harstanak phunphun tong hmanh usilaw, ram le miphun caah an i pekchanhnak kan upat piak hna. Satawn khuatlang zapi nih hriamtlai zapi ralkap nih an kan umhnawh cu tha kan ti lo caah chuahtak dingin kan nawl tawn hna. Sinain an hruaitu nih Satawn khua pawng um cu herh an ti caah tu yiang kan khuapawng ah an um. Khuapawng i an i thial hnu zongah upatnak he kan bawmhchanhtu hna.
An ralkap camp le an ti hman dingtiang khuatlang zapi nih kan tawlrel. Khuatlang nih an umnak ding kan sak lio zongah an kan bawm lo hrimhrim. Cu bantuk an si ko lio ah kan hmualpho hna lo. Khualeng i camp an thial hnu zingah khuachung ah le sianginn ah umhmun an khuar caah kan ngakchia saupi sianginn an kai kho lo. Bomb le meithal an phuah tawn hlei ah kiangkap ah bomb an tarh hna caah kan sia le sațial an tuar. Satil ngei nih zohkenh timh zongah ” Bomb kan tarh dih, ho hmanh kal hlah u” an kan ti caha kan sia le satial kan zohkhenh kho lo in caansau pi kan um. A ruang theih lo in sia a tlau zongah dai te’n kan um.
5) 2022 Nohawng 2 ah kan khua hall ah bomb an phuah ah hall chung thutdan tampi an rawk, a caan ah Tuibual ralhrang camp cu kan khua in an haoh tawn, ralhraang nih lehnak ah khuami inn an duah zongah dai tein kan um tawn.
Satawn khuatlang hruaitu nih bomb le meithal khuachung ah le khuapawng ah puah lo dingin nawlnak kan tuah hna hnu hmanh ah an ngai hlei lo caah, kan ngandamnak, kan lunglei zong nih a tuar. Sii-inn phan zong kan um. Kum upa le ngandamnak thalo tampi kum upa hna zong mah khua hlum ngam lo in talzaam in kan um len. Ralhrang doh si lemlo in meithal le bomb puah dingin tlerhkhonh an kan timh peng hi ruah awk kan hngal hrim lo.
6) 2022 Dipa 11 zarhpi zing suimilaam 7:30 ah khuatlang lungphun pawl ah meithal an puah. Cu hnuah pa pakhat tual i a um sawhmi a ke pawng ah meithal in an kah, an thinhun le lungsi lo nak um paih ah meithal in an kan hro. Khuami caah tuarfak a si. An lakah that kan chuahnak kip hi an hmu kho hrimhrim lai, hnahnawhnak pek rumro an kan timh.
2022 Dipa 11 thiam Christmas hman ding biaruahnak ngei ding timhtuah lio ah meeting nak ah bike in mimung pathum i phur in bomb an chiah. Anmah vial cu an zaak, a pawng um zapi nih meikhu an hmuh in ti in an toih colh. Bomh a puak manh lo, khuachung ah zapi zahnak samfa tia hmanh ngei lo in bike hi rang taktak le awn taktak in an khalh tawn, lampi kalmi caah a him lo.
7) Cu hlei ah an ralkap nih kan chuahpi holh dang mi an hrao hna, Pathian nih a kan pekmi kan nunhrin holh Hualngo holh kan ti. Tu i Duhlian (Mizo) holh hi kan pi le pu chan AD 1450 in tu i Hualngoram ah kan hman cang. 2021 dirmi CNDF ralkap nih oan Hualngoram ah lut in, meithal keng in Pathian nih a kan pek, kan chuahpi holh hmanh hrawhpiak timh hi nunhrin covo buar taktak a si. ISIS Terrorist hna cawlcanghnak he aa dannak a um hrim lo.
8) Peter Thang @ Lal Than Cuang a biachim ah, Hualngoram a um lo tiah a ti. Bu hruaitu pakhat nih history a theihtlawm deuh ningzak ngai a si. Bu pakhat hruaitu nih cun history tlawmpal an theih hlei ah basci human rights biapi ah an chiah a herh ngai. Kan doh lio dictator i i bantuk hruaitu kan neih cun zeiti’n dah Chinland nih ral a tei khawh lai.
Tu Spring Revolution hi Myanmar ram ah Dictatorship hrawk in Federal State dirhnak dingah tumtah a si. 1948 ah Myanmar ram Independent hlaan ah kan pipu ram humhak hi kan tuanvo a si. Hualngoram ah kan pipu hna chan in mahte khua kan khan lai kan rel. Bristish nih1892 ah Chin Hills an lak hnu zong ah Hualngoram tiin a recognized peng, Administration Area pakhat ah a chiah.
Myanmar ram Independent hnu 1962 ah Ne Win nih nawlngeihnak a lak khan mah te’n Administration ngei Hualngoram Circle-1 le Circle-2 tangah kan hruaitu i thim in kan kalpi peng. Peter Thang nih HPO/CDF-Hualngoram cu Separatist an si a ti fawn. Min Aung Hlaing pom Ethnic Armed Organizations le PDF, CDF hna cungah hi bia hi a hman tawn, zei paoh siseh Falam Unification nih phetchem ah holh dang ngei huatter, hruaitu thenkhat lungrualpi hi an duh phun a si.
9) Hualngoram chung ahhin phun kip kan um, a chung le kiangkap um kan unau hna he kan pi le pu chan in nupi pasal ah kan i ngei hna, ci le kuang dang lo in khua kan sa hna. Phun tanhhlei ngeilo in Hualngoram ti nih a huap hna.
Cu bantuk lungrual te’n khuasa mi kan sinak cu nunpeng seh ti kan duh caah Satawn khua zapi nih CNDF ralkap an luh thawk in lunglawm te’n cohlang in, a herhhai kan tawlrelpi hna. Lawmh in lehrulh lo in lih le hrokhrawl in Satawn khuatlang an kan thangchiat hi a poi kho taktak. Hi bantuk hi hmailei ah um hraam ti hlah seh.
10) Satawn khua zapi zeirel lo ti, sawmmi silo in kan khua le ram ah an kan hrocer, harnak a kan petu CNDF ralkap hi Satawn khua zapi nih kan khua le ram in chuak dih u tiah kan in nawl than hna. Hi cathanh ruang ahhin CNDG ralkap kan khua zapi cungah holhrel maw, meithal in maw, hrocernak nan tuah lai lo kan i ruahchan fawn , tiah Global Satawn Union nih cathanh an chuah.