Ngaihchiatnak Thawng : CNA ralbawi Lt. Colonel Sang Lian Thang cu tuzan suimilam 8:45(IST) hrawng ah Trinity Hospital, Aizawl ah lung lei zawtnak in a nunnak a liam. A ruak hi tuzan ah Chinram lei ah tlunpi ding a si lai, tiah thawng kan theih.
Nai Chung Bakah Ram Mipi Thah Mi Hna Hi An Tam Bak Ko. June Thlakhat Chung Kahdohnak Ah SAC Ralkap 50 Hrawng An Thi, SAC Ralkap Nih Mipi 33 An Thah Hna.Kayah le Shan ramri June thlakhat chung ah a cang mi kahdohnak pawl chung ah SAC ralkap 50 deng an thi tiah KNDF nih thawngthanhnak a tuah.
June thlakhat chung Kayah ram Loikaw, Demoso le Shadaw hna ah kahdohnak hme a chuak i Mese, Hpasawng le Ywarthit peng hna ah kahdohnak fak a chuak. Shan ram thlanglei Moebye le Pekon hna zong ah kahdohnak a chuak tiah theih a si.
June 5 thawk in SAC ralkap nih Moebye khuachung ah thazang tampi in an rak lut i khuachung hmunkip ah hmunhma an khuar caah Moebye PDF, Loikaw PDF, URF hna bawm in SAC ralkap pawl an doh hna i thlakhat chung ah kahdohnak fak voi 6 leng a chuak i SAC ralkap 20 leng an thi.
Pekon peng hmunhma cheukhat zong ah kahdohnak hme pawl a chuak i Moebye peng le Pekon peng chung ah kahdohnak vanlawng pawl in voi tampi bom an thlak, hriamngan an kah caah mipi inn, biaknak lei inn pawl a rawk mi an tam tiah an langhter.
Moebye khuachung ah SAC ralkap pawl nih mipi 23 a ruang um lo in an thah hna i an thah mi chung ah pa 20, nu 3 le kum 10 hrawng hngakchia 1 an i tel tiah KNDF nih cun a thanh.June thla chung ah SAC ralkap le KA, KNDF phufonh hna karlak Loikaw peng ah kahdohnak voi 7, Shadaw peng ah voi 1, Hpruso peng ah voi 4 le Demoso peng ah voi 5 tiah kahdohnak a chuak.
Cun June 13 thawk in zarhkhat chung ah Mese peng ah a um mi Thai-Myanmar ramri ah a um mi SAC BP-13 sakhaan, BP-14 sakhaan, BP-15 ah a um mi Metanwe sakhaan, BP-16 ah a um mi Taunghla sakhaan le Mese palek sakhaan, Byu-ha sakhaan hna cu KA, KNPLF, KNDF le PDF phufonh pawl nih an lak khawh i hriamngan telh in meithal le kuanzen tampi an lak khawh tiah theih a si.
SAC ralkap he kahdohnak pawl chung ah KNDF hriamtlai 3 an nunnak a liam tiah an langhter fawn.SAC ralkap nih June thlakhat chung ah Kayah ram le Moebye khua hna ah mipi 33 a thah hna i SAC ralkap hriamngan ruang ah mipi 5 an nunnak a liam i SAC vanlei kahdohnak ruang ah mipi 5 an nunnak a liam.
Moebye khuachung ah SAC ralkap pawl nih pa 20, nu 3 le kum 10 hrawng hngakchia 1 a ruang um lo in an thah hna tiah KNDF nih mipi sin ah theihternak an tuah.Crd:TCLP