Myanmar ram hmun kip ah a luancia June 3 ni thawk in SAC nih sianginn an hon i kahdohnak a fahnak Chinram chung ah sianginn 38 an hon kong SAC kuttang Ministry of Education nih an langhter.

SAC nih cun Chinram chung Hakha, Falam, Mindat, Matupi le Tedim peng hna ah sianginn an hon khawh nain a kai mi siangngakchia an tlawm. Paletwa, Tonzaang, Thantlang le Kanpetlet peng hna ah cun SAC nih sianginn a hong kho lo, tiah theih a si.

SAC kuttang Chinram Education Minister nih cun, “Hakha peng ah sianginn 6, Falam peng ah sianginn 10, Mindat peng ah 4, Matupi peng ah 15, Tedim khuapi a buai deuh hlan ah cun siang 27 hon a rak si, cun Khaikam ah sianginn 3 on a si, tukum cu kum dang nakin a tlawm deuh,” tiah a chim.

Tedim peng ah biatak tein kahdohnak a chuah hlan ah khan cun sianginn 27 hon ding in cazin pek a rak si nain kahdohnak a chuah hnu in Khaikam khuapi sianginn pathum lawng an hon khawh, tiah theih a si.

Hakha khuapi ah sianginn 6 an hon ṭhan nain siangsangrun a kai ding siangngakchia an tlawm ngai, nikum nakin a tlawm deuh, tiah tualchung mi pakhat nih a chim.

“Sianginn cu an hon ko nain kum khat hnu kum khat in siangngakchia an zor i No.1 siangsangrun ah a kai mi cu an fonh dih hna, siangngakchia tam deuh cu sianginn an kai ngam ti lo, ralkap tlak dih ding ti mi phung ruang ah siangngakchia tam deuh cu khuate lei ah an zaam i an kir ngam ti lo,” tiah tualchung mi pakhat nih cun a chim.

Thantlang khuapi telh lo in Chinram chung peng 8 ah SAC nih nikum ah cun sianginn 328 an hon khawh i siangngakchia 35,434 an kai kho, tiah Chinram fimcawnnak zung(Education Office) nih an langhter. The Chin Post

By admin

Leave a Reply

Your email address will not be published. Required fields are marked *