Chin Star top 30- round 4 (second night) zan i minung 15 a sa mi hna lak ah Tlangpi khua Par Tin Tlem tluktu hrim an um lo. Judge Phoebe hrim nih a uar khawh ning cu aisum kho lo i hmai ah chuak in a va kuh bak ko.
Kum 15 minung lawng nih hi tluk aw ttha ngeih khawh khi cu Pathian nih a pekmi thlawchuah hrimhrim asi. Chin Star hlasak zuamnak ah Winner hmu ding i aitlak bik cu kan nau nu Par Tin Tlem bak hi si ko.
Chin Star top 30- round 4 (second night) zan i a vun sak mi hla hrim hi cu a mak kho tuk! Judge nu Phoebe long hmanh si lo in Judge an pathum ning tein comment an pek ning cu lunghmui taktak a si. Judge te nih mark an pekmi ah Par Tin Tlem a sang bik a si.
US Cozah An Khar Chung Men Lai, Zeiruang Ah?
Senate le House nih kumkhat ca cozah tangka hman ding (budget) kong ah hnatlaknak le biakhiahnak an ngeih khawh lo caah US cozah cu an khar chung (government shutdown) men lai.
US cozah tangka kum (fiscal year) cu September 30 (Saturday) zaan 12:00am ah a dong lai i October 1 in cozah tangka kumthar aa thawk lai. Oct 1, 2023 in Sept 30, 2024 tiang, thla 12 chung US cozah nih a hman ding mi tangka kong ah atu tiang Senate le House hnatlaknak an ngei kho lo.
Democratic an tamnak Senate nih budget an tuah i cucu House nih an lungtlinpi lo. Cu bantukin House nih budget an tuah mi kha Senate nih an lungtlinpi ve lo. Cozah budget cu Senate le House nih an lungtlin hnu lawngah President nih fehternak min a thut ding khi a si.
Senate nih budget an tuah mi ah Ukraine bawmh ding tam ngai aa tel i cucu House nih an duh lo ti a si. Cubantukin House nih budget an tuah mi ah US-Mexico ramri khamnak ding ca aa tel mi kha Senate nih an duh ve lo ti a si. A dangdang zong cu a um ko nain a biapi bik cu hi hna pahnih hi a si ko.
Cozah tangka kum cu October 1 (Sunday) in aa thawk ding a si nain budget an tuah khawh lo caah cozah khar chung a hau. Cu an khar chung ah cun Senate le House nih budget kong an i ceih lai, an i el lai i tuan ah lungtlinnak an ngeih khawh ahcun cozah an on ṭhan lai. Cozah khar chung nak hi thlakhat cu a rau kho tiah an chim.
Thlakhat chung ah cozah rianṭuannak tampi an i dinh lai caah tangka a billion in an sung kho. Cun cu cozah rianṭuannak he aa pehtlai mi rianṭuannak dangdang le small business hna zong zeimawzat a hnorsuan khawh ti a si.
US State Department ah a um mi ramdang palai zung (embassy), passport le visa zung hna cu khar a si lai lo. Ramdang ah bawmhnak an pek mi hna cu tangka a um lai lo caah phih rih an si lai. Ramleng vuanci Antony Blinken nih cun cozah khar chung nak nih a hnorsuan ding mi hi a tetuai lai lo tiah a chim.
State Department tang i US ramchung rianṭuantu hna lawng thlahlawh an pek lai i ramleng ah a um mi hna cu rian dinh chung, asiloah thlahlawh loin ṭuan chung an hau lai. Cu nih cun rianṭuantu cheukhat nih State Department tazacuainak zong a chuahter khawh men tiah Blinken nih cun a chim.
US ralkap nuai 2 renglo hna cu anmah le an dirhmun tein an kal lai nain ralkap hmunpi a si mi Pentagon ah rianfurloughuantu sing 8 (800,000) chungin tam deuh cu dinhter chung an si lai, a cheu cu an i din lai lo nain thlahlawh pek rih lo an si lai. Cun CIA, FBI le hlathlainak rian tam deuh cu khar a si lai lo.
Cozah khar chung ruang thlahlawh a hmu lo mi vialte hi budget an tuah khawh i cozah an on ṭhan tikah an thlahlawh tlingtein pek an si lai tiah theih a si.
Salai LIAN