Chin Ramkulh Ah Minister of Security and Border Affairs Thlennawnnak A Um Caah Kahdohnak A Zual Kho tiah CNA biahcimnak nawl neitu Salai Htet Ni nih a chim.
Chin ramkulh ah Minister of Security and Border Affairs thlennawnnak a um hnu in SAC nih Chin ramkulh ah raltuknak ṭha deuh in timhtuahnak an ngeih caah kahdohnak a zual kho, tiah Chin Ralkap lei nih an chim.
Chin ramkulh Minister of Security and Border Affairs Colonel Han Win Aung hmunhma ah Matupi hrambunh Brigadier Colonel Thein Tun Aung an chiah hnu in peng cheukhat ah SAC Brigadier hna zong thlennawnnak an tuah hna, tiah theih a si.
“Kahdohnak a zual deuhnak hmun ah uktu an thlen hna. Hihi anmah ralbawi uktu chung lila ah zumh lonak a um ti a lang. Cu ruangah uknak ṭha deuh in uk an duh caah rian thlennawnnak an tuahmi a si caah Hakha le Thantlang peng ah kahdohnak a zual kho,” tiah CNA chimphuannak nawlngeitu Salai Htet Ni nih Khonumthung Burmese ah a chim.
September thla chung ah SAC ralkap faak ngai in a dohtu Chin, Kachin, Kaya le Karen ramkulh ah SAC Minister of Security and Border Affairs cu thlennawnnak an tuah hna.
Chin ramkulh Minister of Security and Border Affairs rian thar a tlaitu Colonel Thein Tun Aung cu Matupi ah Brigadier rian a tlaimi a si i Mindat khua pawng le Matupi peng kahdohnak lioah ralkap tam tuk an rak thih caah a rank an ṭumter mi a si tiin thawng a thang.
“Chin ramkulh ah atu bantuk rian thlennawnnak an tuahmi hi kahdohnak faak deuh in kalpi an timh caah a si. Nikum nakin tu kum ah SAC ralkap an i timtuah dan a ṭha deuh lai.
Matupi ah ralkap lei thawng an kan pek ningin an i timtuahnak a ṭha ngai. Asinain zeitik ah dah rallam an sial te lai ti cu kan hngal lo, kanmah lei zong ralring tein kan um ko,” tiah CDF-Matupi Secretary nih a chim.
Matupi khua hrambunh SAC ralkap sakhan zong ah dantatnak le rian thlennawnnak an tuah. Brigadier hna zong atu le tu an thlen hna. Atu lio Brigadier thar zong hi mi zei dah a si ti hi fehter ding ah a har, tiah a chim chap.
Cu pinah Chin ramkulh chung ah SAC ralkap Battalion ningin thlennawnnak an tuah i ralkap hna zong CDM an tuah sual lai ti hi SAC ralbawi hna nih an phang ngaingai. SAC ralkap nih rallam an sial lo ahcun an sakhan laak dingin timhtuahnak kan ngeihmi a um len, tiah Chinland Joint Defense Committee (CJDC) Secretary nih a chim ve.
Chin ramkulh dohthlennak a kumkhatnak ah SAC ralkap sakhan 1 an laak khawh i a kumhnihnak ah sakhan 8 an laak khawh, tiah September 7 ah NUG nih dohthlennak kum hnih tlin camtuak ah an report an chuah.
SAC ralbawi zik Min Aung Hlaing nih cun Chin ramkulh, Sagaing ramṭhen, le Kaya ramkulh uk khawh ṭhan dingin a kuttang ralkap le cuka ramṭhen le ramkulh uktu hna cu July 13 ah nawl a rak pek hna, tiah theih a si. The Chin Post