Chin Miphun Nih Do Uh Sih Ti Ka Duhmi Cu:
1.Sifahnak ral hi a lamkip in do hna uh sih. Sifahnak (poverty) hi biatak tein kan doh cang awk a si. Pakhat le pakhat a lamkip in kan i bawmh ding a si. Pathian duhmi a si fawn. Kawlram ah a sifak bik state le miphun kan si. Mahhi philh lo ding.
2. Sipuazi tuah thiam lo ral zonghi do hna uh sih. Chin miphun cu sipuazi thluak kan nei lo tuk ka ti theu tawn. Phaisa hmanzia le a khonzia zong kan thiam lo. Sipuazi tuahthiamnak fak piin cawng hna uh sih.
3. Fimcawnnak (education) huam lo ral zong biatak tein do hna uh sih ti ka duh. Miphun thangcho le ramthangcho vialte nih fimcawnnak an duh dih i tha an pek dih cio. Fimcawnnak caah phaisa hman zong kan siang lo. Fimcawnnak lei i kan der tuk ahcun a zeilei hmanh in kan thangcho lai lo. Human resource tamtuk kan herh.
4. Khrihfa biaknak le cawnpiaknak i nunpi duh lonak ral zong do hna uh sih. Kum 125 nawn Khrihfa kan si cang nain Khrihfa biaknak le cawnpiaknak cu kan i nunpi kho tuk rih lo ti khawh a si. Mah ral zong doh ding. Biatak tein Khrihfa cawnpiaknak i nunpi khawh ding in rian kan tuan a hau/ttan kan lak a hau i kan i cawnpiak ning zong kan remh deuh a hau.
5. Pawngkam zohkhenhnak lei ah kan chambau tuknak ral zonghi doh a hau. Saram, nga, vate le pawngkam thingkung ramhnah zohkhenhnak lei ah biatak tein tan kan lak a hau i fak deuh in kan i cawnpiak a hau/rian kan tuan a hau. Laitlang ah a um lomi saram le thingthei zong hmundang le ramdang ah lak hna i Lairam ah thlah i cin hna ding an si.
Dohding ral tampi kan nei ko lai. Aruang cu miphun fate le thangcho lo kan si. Kan ram tuknak a tha fawn lo. Pathian nih a lamkip in thangcho nak kan pe ko seh. Saya Van Tum