Pathian nih kan ral ngaihthiam ding a kan duh piak nain a kan pek mi ram ven ding zong tuanvo a kan pek chih. Ralkap dirhmun in kan Chin ram kan dirh kamh mi hi ram mi (citizen) kan si nak ah a sang bik mi a si. Ral kan thawh hnu cun a pahnih nak (runner-up) um lo.Kan ral kha teng lakin (knockout) kan tei a hau.
Ralhrang thazang le kan thazang kong ka ruat.Kan thazang tlawm lengah kan i zuk duahmah. Kan ram nih ralkap caah pumpak pakhat cio a kan herh ti ka lung a um.Delhi chuah takin CNA ah full time training ka kai lai i part-time ralkap herh zawn ah ka tuan ve lai tiah bia khiahnak ka tuah. Kan nu ka chimh saupi ka lem i a hnu pi ah kan nu sin in hnatlaknak ka ngah.CNA kan pa le chimh hna tikah ralkap ca ahcun “ UPA’ tuk cang ti a si ko ( The End ).
Kan dothlennak dih in kan ram sersiamnak a ra rih lai i kan lamthluan hi a rau lai caah ralkap thazang hi kan herh bik mi cu a si.Cucaah ral a do kho mi poah cu ralkap training kan kai dih i herh caan ah ral a do kho dih mi miphun kan si hrim a hau.
Ram chung ummi mino vialte le India i ummi mino poah cu tlun in ralkap training kan tuah ding le kan duh awk zong a si.Secular nan kai zongah,Bible sianginn nan kai zongah,ram dang kal nan hngah zongah nu he pa he ralkap training kai nak caan tha kan ngeih hi mi vantha ah kan i ruah ding a si.
Kan ralkap hna hi ral an tuk lai ah tih phannak an ngei ve.Thla an cam tuk ve.Kanmah nak hmanh in thla a cam deuh mi kan ralkap nih an tuar bik.Tulio hi kan miphun nih kan tuar bik caan a si.Ngaihchiatnak in kan tuar,thluak le lungthin in kan tuar, taksa in kan tuar.Hi vialte tuarmi lakah miphun ralkap sinak in tuar hi a har bik le miphun dawtnak i a sang bik mi tuarnak cu a si.
Mino hna kan mi phun caah zei bantuk tuarnak dah nai thim lai? Pau dothlennak cu mino thawkmi dothlennak a si mu.Na mino hawi mithmai zong ka rel thiam hau cang lai. Salai Tin Maung Win