Central Lairam, Lawngtlai 2023 Pur 1: 2023 Biangreithlep 5 ah Young Lai Association, Sub-Headquarters : Sangau Executive Committee tuah a si i, mah caan i an biaceih khuakhanmi le biakhiahmi cu:
1. Pi Biak Sui le Pu B.Lalṭhafamkim le Pu Bablu thah an sinak ah, CDF – Mindat etc. lei nih a tuanlei in a thattu hna YLA sin i an pekchanh khawh nakhnga YLA Sub-Hqrs:Bualpui (NG) nih kanmah lei ramri phitkhar ve ding in ṭuanpi an kan nawlnak cu CYLA nih YLA Sub-Hqrs hna sin ah “Ram le Miphun he ai pehtlaimi thil, ramchung ca i a biapi tukmi thil ah cun CYLA ruahnak le duhnak hal hmasa lo in hma rak la lo hram u” tiah nawlnak a rak tuahmi upat bu in le dirhmun zohchih bu in Sangau Sub-Headquarters pengchung ah cun hitihin pehzulh ve siseh tiah hnatlak a si:
a) East Lairam he kan i tlawnkainak ramri – Saisihchuak, Ralvenchuah, Fungsih, Hmunchunh le Thanngerh chuak cu rikhiah um lo in zan 7:00PM in zinglei 5:00AM tiang phihkhar a si i, hi caan chung ahhin i tlawnkai (India lei maw Myanmar lei ah peh) sian a si lo. Lakhruak (Emergency) thil le thih lohnak kong ah cun a herhning in on khawh a si lai.
b) Mah caan chung ahhin a herhning in Chun le Zan Duty ṭuanvo lak ding in Ramhlun Branch YLA le Pangkhua Branch YLA cu thiah an si i, cupin ah Sangau Town Branch YLA dang hna zong nih mah Branch chung cio ah a herhning in rak pehzulh cio ding an si fawn. Cun Lakhruak thil a si maw thih lonak kong le thildang zong ah YLA Sub-Hqrs:Sangau le Ramhlun Branch YLA le Pangkhua Branch YLA hngalhpinak lo in cun pumpak maw Lawngpu zong nih mah nawl in Ramchung ah le East Lairam lei ah minung maw thilri rak thai lo ding.
c) East Lairam lei ramri i Duty mi Chin National Army lei le East Lairam lei khuachingchan hna zong nih zan caan ah ramri phihkhar a sinak hi rak kan pehzulh piak ve ding in le a bik in CNA lei nih nawlngai lo in ai chawkhlanmi khual an um lo nakhnga a herhning in ṭuanvo lakpiak hram ding in nawlnak tuah a si.
d) CDF-Mindat etc. lei zong YLA duhnak hi a rannak in vun tlamtlinh hram ding in nawlnak tuah an si.
2. India lei Motor Vehicle pawl, East Lairam lei i a lutchuak tawnmi hna nih cozah le YLA nih sian lomi thil Rithaisi le Hriamnam lei le thildang a phur lo hram ding in YLA nih cun kan in nawl hna.
YLA nawlpatnak zei ah rel lo in nawlbuarmi kan um a si ahcun a herhning in a fak khawhchung dantat kan si lai i, nawlngai lomi nih harnak kan ton sual a si zong ah YLA nih ṭuanvo a la lai lo. Kan Branch YLA pawl zong mah le Branch chung cio ah a herhning in hi hna pawl hi rak ngiathlai peng ding in le rak check hlai tawn ding hna u tiah cathanh an chuah. The Lairam Times