CDF-Mindat Ralbawizik Nih Pumpak Le Phu Pakhat Khat Tang Um Kan Hrial Lai Tiah A Chim
CDF Mindat cu pumpak a siloah phu pakhat khat ukhruainak tang um kan hrial lai i, dohthlennak a tuahtu phu khat le phu khat i upat in rian kan ṭuan lai, tiah CDF-Mindat ralbawizik nih CDF-Mindat kum 2 tlin camtuak April 24 ah a chim.
“Chan khat hnu chan khat a kal cuahmah mi hramhram uknak tang ah Chinram cu a sifak bikmi ramkulh pakhat a si ko nain hramhram uknak a hram in kan bongh lai tiin mipi ralkap nih nan i zuamnak thawng le ramdang um kan unau hna bawmhnak thawng in atu dirhmun kan phak khawhnak hi a si,” tiah a chim.
CDF-Mindat kan dohthlennak kum 2 tlin camtuak ah NUG, CJDC, ICNCC, CNO/CNDF le AA telh in ṭangṭi phu 10 leng nih lunglawmh pinak ca an kan kuat, tiah an langhter.
A luancia 2021 ah SAC ralkap nih, ralkap uk duhlonak a rak langhtertu Mindat khuami 7 an rak tlaih hna i, an thlah hna lo ruang ah 2021 April 24 in hriamnam i tlaih in CDF Mindat cu an rak dir. CDF-Mindat kum 2 chung an dohthlennak lamthluan ah CDF-Mindat pasalṭha ralkap 55 nih ram le miphun ca ah an nunnak an pek cang, tiah theih a si.
