Pu Lianhmung Sakhong nih phung a chim lai an ti caah keimah zong kan Khrihfabu pumh kal takin IBC(Immanuel Baptist Church) ah ka va i pum ve. Kan hnu March thla 26/2023 ahkhan a si i, chun suimilam 12:00 ah a si.

Pumhnak service chungah NCCF nih cauk laksawng in peek an timh i. khual ka si caah a si lai, nangmah nih na pek lai an ka ti. NCCF nih “NCCF Le Chin Khrihfau Tuanbia“ timi cauk kan chuah i, a min le a hmanthlak aa tel len ve caah ukkhat in laksawng kan peek lai tiah, pulpit cungin an rak thanh.

A petu le a cohlangtu rak kai ulaw hmanthlatu nih hman kan thlakpiak u, an ti rih. Pulpit cung cu kan kai i, ciammam tein kan i pe ve. Kan kut kan i tlai, pakhat le pakhat kan i zoh. Hmanthlak ding a si caah zapi lei kan hoih rih. Pakhat hmanh kan palh rua lo dah. Rumra a ngei ngai men ko lai. Hro zong a kual ngai men ko lai.

Asinain, pumh a dih in media lei a tlaitu hna sinah ka va kal colh i, “hmanthlak kha nan ka kua kho ve lai maw“ ka va ti hna. Kan naupa pakhat nih, “sorry bak si, kan thla manh lo“ a ka ti colh ve. Keimah ve zong cu “OK“ hei ti koding kha “Are“ ka ti manh ve hoi. Kaa ngaichih pah. Cauk kan i peek lio “akuat“ kan laak dan kha ka mitthlam ah a hong cuang i, kanmah hna chan lio a rak cang balmi thil pakhat kong ka lungah a hong chuak vuaimai.

Kanmah hna chan lioah hlasak thiam ngai le hlaphuah thiam ngai pakhat a rak um(a min chim hlahning). Voikhat cu an khua nungak dawh bik a helh an ti. Zeitin a helh cu kan thei lo nain, nu zia kan ti cu nungak nu nih kaan duh zong a ti bal rua lo i, kaan duh lo zong a ti bal ve rua lo. Hlaphuah thiam kan ti cu leklak hla a phuah colh ve.

Hlasak thiam cu si hoi kaw, a hlaphuahmi cu zan thlapa vang tangah lungleen taktak in zanthum chung nungak nute innhmai ah a va sa rua. Hla fungkhat a dih tiang sak cu nungak nute innhmai ah a tlawm bik lehnga le lehruk cu aa hel len lai tinak a si. A za diam a ti hnuah a ngol rua. A thaizing ah a hawipa kha tu zan va leng tuah hmanh.

Hla ka phuahmi zanthum chung bak an innhmai ah ka va sak i, zeitindik a um ko lai dah. Ka kong hna va ceihpi tuah law, a biachim le a mithmai zeidah a lawh a ti, an ti. A kiptuh ah a hawipa cu “na va leng maw“ tiah a hal i, a hawipa zong nih “ka va leng ko. Nain a rak um lo. A nulepa le a naunu lawng an rak um. Hakha a kalnak zarhkhat a si cang an ti“, a ti, an ti. Mah cu bak cu ka lungah a hong chuak ko.

By admin

Leave a Reply

Your email address will not be published. Required fields are marked *