SAC Ralkap Nih Mindat Khuachung Ah Jet Fighter In Bomb A Thlak. Mindat khuachung hmun pakhat ah SAC Jet Fighter nih nihin March ni 13, zan suimilam 9:30PM hrawng ah bomb a thlak tiah theih a si.
Mindat khuachung hmun pakhat ah cun a thlak cu a fiang ko, a hmun belte fiang in kan thei rih lo. Cun, SAC ralkap sakhan lei in hriamngan pehtlai in an thlah ve fawn tiah tualchung mi pakhat nih a chim.
Naypyidaw hrambunh vanlawngbual in a rak i thawhmi SAC Jet Fighter 2 cu Mindat, Saw le Htilin ramri ah tuzan suimilam 9:00PM hrawng ah aa hel tiah raltuknak vanlawng ngiathlaitu phu Wai Hin nih a langhter.
Relchap- Nikhat Chung Ah SAC Ralkap 40 Leng Thah An Tong. March ni 12, nikhat chung a cangmi kahdohnak ah SAC ralkap chungtel 40 leng an thi, 10 nih hliamhma an tuar tiah NUG cozah nih cathanh a chuah.
Atu ah cathanh chuah in SAC ralkap a thimi zat langhtermi nakin, a tak ah a thimi an dam deuh kho tiah a langhter. Fak ngaiin kahdoh a chuahnak Sagaing ramṭhen, Khin U peng ah rallam a sialtu SAC ralkap hna cu PDF nih bomb puahhnawh in an kahdoh hna caah SAC ralkap a thimi zong an um.
SAC ralkap nih tualchung mipi hna cung ah hramhram thilsual an tuahnak cu a zualhma chin i mizapi nih mah nunnak himnak ding caah tiin SAC ralkap cu an doh ve. Myanmar ramchung um mipi hna nih SAC ralkap uknak in luatnak ding ca ah le Federal Democracy ngah khawhnak ding ca ah tiin dai tein SAC ralkap uk duh lonak cu an langhter caah SAC ralkap le tualchung hriamtlai, tlangcuang hriamtlai phu kar kahdohnak a fak chin tiah theih a si.
NUG cozah nih a langhter ning ah cun mah nunnak i ven in SAC ralkap doh ve ding thawngthanhnak a tuah kum khat chung ah SAC ralkap 20,150 leng an thi i minung 7,000 leng nih hliamhma an tuar, tualchung hriamtlai phu lei in minung 1500 leng an nunnak a liam tiah NUG caan karlak President Duwa Lashi La nih a chim.TCP