Zo hnahthlakte leh Meitei inepna Manipur-ah Kristian biak in engemaw zat tihchhiat a ni tawh a, Indigenous Tribal Leaders’ Forum (ITLF) te’n an chhinchhiah danin, biak in hi 253 chuang tihchhiat a ni tawh.An buai tirh atangin Meitei lam hian biak in leh kohhran hmunhma an bei a, ITLF lam chuan biak in 253 chuang bakah kohhran hmunhma 93 chuang tihchhiat a ni tawh tiin an chhinchhiah.
Manipur atanga thu dawn danin, Manipur-ah hian Zo hnahthlakte hian kohhran hrang hrang an nei a, biak in pawh a tam; mihring tam vak lohna khuaah pawh biak in hi pahnih pathum an awm thin.
ITLF hian he buainaah hian Zo hnahthlak mi 136 chuangin nunna an chan tawh niin an hria a, an zinga mi 86-te chu nunna an chan tih finfiah tawh niin, mi 50 chuang an chin hriat loh, finfiah loh an awm tiin an chhinchhiah.
Hliam tuar zat hi chiang faka hriat theih a ni lo a, Lamka District Hospital bikah hliam vanga lut mi 220 an awm tawh.Zo hnahthlakte khua 160 chuang hal a ni tawh a, chenna in 4,500 chuang tihchhiat a ni tawh bawk.“Anni lama nunna chan zat hi hriat theih a ni lo a, keini aiin an tam fe tih kan hria,” tiin Zo hnahthlakte hruaitu pakhat chuan The Aizawl Post a hrilh.
Tun hnaia an inep natna Sugnu khua leh a chhehvelah tunlai hian an inep na lo a, tun hnai ni li vel chu silai a puak tawh lo tih thu dawn a ni.Chutih laiin Thawhtanni chawhma dar 11:45 velah khan Kangpokpi district-a Saikul velah an inkap leh a, thi leh hliam an awm em tih hriat a ni rih lo.