South Africa rama palaeontologist-te chuan Thawhṭanni khan khawvela inphumna hlui ber ni ngeia hriat, B.C. 2,00,000 hunlaia mi an hmuh chhuah thu an sawi. Hemi hma hian mihring inphumna hmun hlui leh upa ber chu Middle East-ah leh Africa-ah hmuh chhuah a lo ni tawh a, mihring phumte pawh kum 1,00,000-a upa an niin an sawi.
Palaeoanthropologist hriat hlawh tak, Lee Berger leh a hote hian Johannesburg-a UNESCO Heritage site, Cradle of Humankind bul maia feet 100-a thukah heng inphumna hmun hi an hmu chhuak. Mihring chi (Homo sapiens) hnaih tak, mihring aia thluak te deuh zawk ni si, Homo naledi an tihte inphumna niin an sawi a ni.
Homo naledi-te hi zawng leh mihring inkar pianhmang nei, mihring chi hnaih tak, feet nga (5)-a sang leh an thluak serthlum tiat vel niin, hmanraw hum nan leh kal nana kut ṭang leh ke ṭang kawm tak nei an ni. He thil hmuh chhuah hian mihringin evolution kan lo hriat dan a her danglam thei hret tura ngaih a ni.
Lee Berger-te hian helai inphumna hmun leia kua awmte chu tihpalh avanga awm ni loin, awmze nei taka tihkuak niin an ngai a, thlan anga laih, a chung lam khuh thlap a nih thu leh a chhungah hian homo naledi ruang panga an hmuh thu an sawi.