Yangon ramṭhen, Bahan peng, Kyaikkasan (ကျိုက္ကဆံ) sang ah ralhrang bawi hlun (Pension) Ye Min Than cu meithal kah a ton caah a thi, tiah SAC ralhrang a cohlangtu thawngthanhnak hna le tualchung mipi hna sin in theih a si.
Vaupi 29, zinglei suimilam 9:55 tluk ah Ba-han peng, Kyaikkasan sang ah motor a khal liomi SAC ralhrang bawi hlun (Pension) Ye Min Than cu hriamtlai phu cheukhat hna nih an kah caah hmakhatte ah a thi colh, tiah an langhter.
“Motor he a rak chuah lio ah an bawh i an kah thah, SAC ralhrang le palik ralhrang pawl nih a pawngkam hrawng ah Checkhlatnak an tuah chuahmah liopi a si, anmah he aa pehtlaimi a si lai” tiah tualchungmi pakhat nih a chim.
“Thah a tongmi ralhrang bawi hlun (Pension) Ye Min Than hi Yangon khuapi chung mipi hriamtlai phu UG hna tlaihkhih an ton lio ah aa teltum biktu a si” tiah Yangon khuapi hriamtlai in ṭuanvo ngeitu pakhat nih a chim.