1. Lamhruaitu le icawnpiaknak caah a ttha bikmi Baibal tling kan ngei cang (2 Tim. 3: 16), Baibal i a ummi Pathian bia hi kan caah a zaa diam. Pathian aw thar kan herh ti lo.
2. Profet chan asi ti lo (Heb. 1: 1-2). Chawnh khunmi minung Pathian nih ai chiah ti hna lo. Prophet cu Judahmi chung lawngah hin an rak um tawn, atu ahcun Judahmi hmanh nih profet an ngei ti lo.
3. Pumpaak icawnpiak, thawngtha va chim cu Pathian nih Amah rian ah a chia ti lo, zumtu hna kha a kan fialmi asi cang, zumtu hna nih kan tuah dingmi an si cang. Cucaah, Pathian nih aw in von cawnpiak len ding khi asi ti lo, zumtu rian asi ( Mat. 28: 19-20).
4. Tuah dingmi thil tha kan theih fian khawh nakhnga Pathian nih khuaruah khawhnak thluak, thinlung le fimnak a kan peek ko caah Pathian nih vancung in aw nih von chimh lengmang kan hau ti lo.
5. Thiang Thlarau nih a kan umpi i lam a kan hruai ko caah Pathian nih aw in von tlangtlaak len kan hau ti lo.
6. Pathian nih aw in rak kan chawn rih selaw, a fale hna hi kan chan chung ahcun voi khat cio tal cu a kan cawnh cio hrimhrim hnga. Pathian cu mi ttha, mifel le mirum lawng chawnh a hmangmi Pathian asi loh. Misual deuh poh hi a kan chawnh hnga i a kan cawnpiak hnga (Luke 19: 20).
7. Pathian nih na thinlung ah bia a chim khawh men. Aw cun an chawn lai lo. Sehtan le khawchia nih vanmi thiang hna muisam le aw-an in mi a hlen tawn hna kha va philh hlah uh. (2 Kor. 11: 14).
8. Pathian nih aw in rak kan chawn rih selaw, Pathian bia cu Baibal ah ttial khawh asi caah, Pathian nih a chim tharmi pawl hi Baibal ah khumh thluahmah khawh an si rih hnga.
Baibal i khumh khawh zong asi lomi Pathian bia na theihmi cu zeibantuk Pathian bia dah an si hnga? Baibail tial khawh asi ti lonak cu Pathian nih aw in bia a kan chimh ti lo caah asi, profet ai chiah ti lo caah asi (Bia. 22: 18-19).