3rd May, 2023 (MSR) : Assam Rifles chuan nimin khan Khatlaah Media Conclave an buatsaih a, AR hotute chuan tuna an awmna hmun atangin Zokhawsangah insawn dawn mahse an insawn hun tur tak erawh an la sawi theih loh thu an sawi.
Assam Rifle officer-te leh thuthar thehdarhtute an inkawmnaah zawhna chhangin Assam Rifles hotute chuan, Aizawl atangin an hmun pui thar Zokhawsang a, in sawn turin Mizoram sorkar nen MoU ziah a ni dawn tih an sawi a, an insawn hun tur hi tun dinhmunah an la sawi mai thei lo va, order an hmuh veleh an insawn dawn tih erawh an sawi a; Zokhawsanga an hmun thar turah tih fel tur a la tam thu an sawi bawk.
Media conclave-ah hian Assam Rifles ten kum 2021-22 leh 2022-23 chhunga an hmalakna tlangpui an tarlang a, project chi hrang hrang 24 an thawk a, Mizoram hmun hrang hrangah national integration tours, sports meet, career guidance counseling, free medical camp, hmeichhiate chawikanna lam programme, infrastructure development leh vocational training te, civil mite tan an buatsaih thin tih an tarlang a.
Sorkar kumtharah hian kawng hrang hranga thalaite; hmeichhia leh naupangte hmasawnna leh chawikanna tur ruahmanin conclave leh national integration tour bakah kawng hrang hrangah hmachhawp an nei tih an tarlang bawk.