“Israel an tuk hna ahcun, a zoh sawh in maw a zoh hna lai tiah na ruah?” ti si. Israel Jet fighters nih Gaza khualipi cu an phomh ciammam, an inn sang pipi zong cim put, cim put a cheih ko hna. Tlakrawh, lung le thir nih ceilak a nenh hna, a thah hna. Mah hmanh cu, “a hramthawk lawng si rih,” tiah Benjamin a thanh.
Tanks ṭhaṭha he, vanlawng he, tilawng he ti in Gaza cu Israel ralkap sing renglo nih an fuh. Sing thum reserved kan chiah rih, ti si. Gaza cu mei an pe ti lo, eidin-rawl luhnak an phihpiak hna, electric mei an chahpiak fawn hna.
“Sualnak neilo kan mipi nan thah paoh ah, kan tlaihmi Israel miphun pakhat hnu pakhat in kan thah duahmah ve hna lai. Kan thah hna lio an aw he an video he kan chuah lai” tiah Hamas nih Israel cu a tlerh ve.
Hamas nihcun Israel miphun zaa renglo an tlaih hren hna.IDF nih, kan miphun an tlaihmi pawl an thah hna zongah kan phomh thotho hna lai, Gaza Strip cu a ningpi in kan lak dih cang lai tiah an thanh.
Benjamin Netanyahu nihcun Middle East muisam ka thlen cang lai tiah a hacang ai rial. Kan teirulcham ai thawknak lawng si rih, ti si ko. India media cheukhat lebang nihcun, Hamas pawl cu Gaza Strip chungin zaamnak hmunhma hrim an ngei kho lai lo tiah an thanh.
Muslim ta Al Jazeera batorte nihkhin Hamas lei ṭang in heh tiah thawngthanh le thli thlah ai zuam ve. Israel sual tuk ruangah hei ti phun, ralhrang a rualrual in hrin a hmangmi Palestine pawl khi vawlei mipi nih an zaang fak hna seh tiah a au ve lengmang ko. Salai C Alexander