Ainak Khua Pawng Lainawnnak Kong : Update
Mizoram, Siaha khua mi Pi Suite, B. Lalṭhafamkima le Bablu-(kala miphun) hna cu CDF-Mindat chungtel ah ruah mi pakhat nih 19, March, 2023 ah khan mizoram ramri Ainak khua lei ah a kalpi hna i, Nizan 22, March Zaanlei ah ah Ainak khua pawng ah an ruak hmuh a si, tiah theih a si.
Min langhter a duh lomi le hi thawng a hngaltu pakhat nih cun, “Pi Suite hi CDF pa he aa hngalmi an si i, phaisa thlennawn kongkau ah Ainak lei ah cun an kal. B. Lalṭhafamkima hi motor ngeitu(driver) a si i, Pi Suite nih a motor a hman mi a si. Pablu hi kala miphun a si i, a konglam fiang in ka thei lo. Anmah a kalpitu hna CDF pa hi CDF-mindat lei chungtel a si tiah kan theih caah pehtlaihnak kan tuah hna i, hlathlainak kan tiah cuahmah lio tiah a kan leh,” tiah tualchung media ah a chim.
Central Young Lai Association(CYLA), Information secretary nih, “Hi kong he pehtlai in CNA lei cu kan pehtlaih hna i, thawngfiang an thei ve rih lo, hlathlainak kan tuah cuahmah lio tiah a chim. CYLA lei zong kan member B. Lalṭhafamkima ruak dong ding in kan kal lai,” tiah The Chin Post ah a chim.
Nunnak a liammi hna hna cu an ruak a rawhral pah caah Siaha khuami an si tengteng ko tiah palik le forensic lei fehternak cu a um lo nain, Siaha khuami pathum hna cawlcangh ning le ruak umtu ning zoh ah anmah an si ko tiah ruahdamh in tualchung mi le zatlang hruaitu hna nih an ruak cu an fimhlawm hna. Hmanthlak : Saiha khuami a hruaitu