AA Nih Hmunram Kauh An Timh Caah Chinland Council ralkap He An I Kap. Chinram, Matupi peng ah CNA telh in Chinland Council ralkap le Rakhine ralkap AA kar kahdohnak a chuak i AA hruai mi Chin Brotherhood ralkap nih AA cu an bawmh hna kong, CNF/A chimnak nawlngei Salai Htet Ni nih a chim.

AA hruai mi Chin Brotherhood pawl nih cun, “CNF/A hruai mi ṭangṭi phu nih kan hnulei in an kan kah caah a luancia June 24 in nizan July 8 tiang ah kaphnih kar kahdohnak voi 8 tiang a chuak,” tiah an thanh ve.

Kahdohnak kong he pehtlai in Salai Htet Ni nih cun, “Kaphnih kar kahdohnak kan ti tik ah AA he i kahdohnak a si i CB pawl nih hin thilri pekchanh in an bawmh tawn hna. SAC ralkap nawlngeihnak a hram bongh i timh lio i hmunram cuh le kauh rak i timh cu miphun buainak a karhter chintu a si kho, AA le CB tuahsernak nih hin Chin ralkap kar remdaihnak a hlatter chin lengmang,” tiah a chim.

Cu lio ah Chin Brotherhood lei nih cun, Matupi kahdohnak ah a kan telpitu Arakan Army(AA) le Yaw ralkap hna cung ah kan i lawm tuk hringhran, anmah he pehzulh in kahdohnak kan kalpi rih lai. Chinram a luat khawh nakhnga Arakan Army(AA) le Yaw ralkap hna he Operation CB kan kalpi lio ah CNF/A hruai mi Chin hriamtlai phu hna nih hnahnawhnak tu an kan pek i ralkap thazaang tampi he an kan kah, tiah July 7 ah khan cathanh an chuah ve.

Chin Brotherhood chungtel CDF-Matupi Brigade-1 in chimnak nawlngei Salai Bawi Uk nih cun, “Matupi ah a um mi SAC ralkap sakhan pathum cu June 29 ni ah khan CB le ṭangṭi phu nih kan laak nain Matupi khuapi kiangkap ah a um mi CNA ṭangṭi phu nih khuapi chung le khua leng ah humhimnak a la mi kan ralkap an kah hna ruang ah CB le ṭangṭi phu in minung 10 hrawng an thi cang,” tiah a chim.

A luancia June 18-24 tiang AA hruai mi ṭangṭi phu le Chinland Council ralkap kar kahdohnak ah Lieutenant Colonel pakhat telh in CC ralkap 4 an nunnak a liam ve, tiah theih a si. Crd: The Chin Post

By admin

Leave a Reply

Your email address will not be published. Required fields are marked *