Atu lioah Thlanglei unau hna, a hlei in Mindat le MDF ttanhtu le an ralkap cheukhat sinin mi tampi nih AA an dirpi hmuh khawh a si. A cheukhat online in an chim mi le an ttialmi tete dawi tikah Arakan he ram ser tti ding timi ruahnak tete an kaa in a chuah pah zong khi hmuh khawh a si.
AA nih Paletwa ram chung i ral an rak tuk thok lio, a luancia kum 10 hrawng lioah Chin mibu kip nih duh lonak an rak langhter. Cu lio ah AA minung pawl nih Chin mi dohdalnak an rak lehrulh tawn daan cu Arakan he democracy in nan um tti lai I nan I nuam deuh lai. Rakhine ram cứ a rum.
Kawlram he um ttinak in a let in nan I nuam deuh lai an rak ti. A cheukhat nih Chin pawl nan hruh ning hi cu an rak ti pah len fawn. Cu meialh te cu duhsah tein a lawn I atu ahcun CNA le a cheukhat pengtlang uar lo lung in cu ruahnak cu tlanglei kan unau hna cheukhat kaa in a chuak pah lengmang.
Hi mei-alh hi, kan mino pawl lungput zoh ah, dohthlennak he pehtlai in emotion a tam ning le an ral ah Kawl ralkap lawng an ruah ning zoh ah, a alh a puam chin vima lai lo, ti chim awk a har. Cucaah atu tan kan ram buainak hi Chinmi caah atu nakin a hnoksak chin lengmang rih lai ti khawh a si.
AA cawlcangh ning hi zoh tikah ral a thokka te hrim in Paletwa, Chinmi umnak in a thok. Chin he ai ramri nak, Chin mi a tam-u khuasaknak tthiam a nam i ralzam ah a cangmi a tam-u zong Chin an si.
Media le a hmunhma cawlcanghnak ah Khumi le Chin timi an dan i Khumi kha Chin nan si lo timi an kheih cuahmah hna. Cu pah cun an uk hna, an Tthio hna i kum hra a liam cang nain khua kir timi a um rih lo. AA uartu Chin cheukhat pawl nih AA tthatnak an chim len lioah a ei a ei kho lomi cu Paletwa peng mi an si.
Nan um tti bal lo I nan thei lo, tiah Facebook ah an hei comment tawn hna. Phundang cun ral lawng tu loin Rakhine ai ti lomi minung pawl zong a tthawl chih hna ti khawh a si. AA caah cun Kawl zong tthawl, Chin zong dawi—Kuan khat in sa pahnih kah kan ti lai cu.
1027 operation a thokka tein, Kokang le TNLA nih ram an laak thluahmah mi zoh tikah AA nih Paletwa hi a biapi in ai hmaithlak mi a si te lai timi hi rak ruahdomh khawh pah cio a si. Paletwa peng chung ralkap buuk nganbik pahnih an laak.
Sami Khua a nam lio cuahmah ti a si. Sami zong hi a laak chom lai tiah zumh a si. Cun Paletwa khua a zuan hnawh lai tiah zumh a si. Paletwa khuami tampi cu an zaam chung cang timi thawng zong nan hmuh cio lai dah.
A luancia i Paletwa ram chung a rak tuk lio he a van i dang hrup mi cu tutan ahcun Paletwa mi dah lo a pawngkam um Chinmi tribe pawl hriamtlai pawl nih an caak lo lawng si loin AA tang I ral a tu bak vemi ah an i tel mi hi a si.
Chin hriamtlai lakah AA duhsah tein an i cawh i Pakhukku lei lam, Chaklei Chinram in a ra dingmi lam vialte CDF he an phih. Amah sinah training a kaimi Chin tribes cheukhat ai rawih hna I duhsah hnguansam in an nam hna. Ralkap buk pakhat hnu pakhat in an laak.
Ngaihchia le lungdong ngai in Paletwa a ngeitu Khumi nih an boruak an cuanh lioah an thisa khat a simi an pawngkam um Chin mi cheukhat nih cun anmah ramri a him paoh ahcun a za tiin AA kut ah dong khat hnu dong khat, kar khat hnu khar khat, khua khat hnu khua khat in an ap cuahmah.
CDF Paletwa an si ah Khumi an si ah CNA he i naih deuh in a ummi an si caah thawngpang tete a leak zong ah CDF Paletwa an si ko lai, tiah kanmah Chin mi lila nih sual an phawt tawn hna hmuh khawh a si.
Kum thar hlan ah maw, January chung ah dek Paletwa cu Rakhine AA kut ah a ning in a tla cang lai. 1027 operation hi Paletwa an laak hlan ah an dihter lem lai lo dah.
Khi tikah AA caah a ttang ngai mi pumpak pawl, CDF hruaitu le an supporter pawl sinah hal a ka hiar ngai mi biatlang tete a um. Cu hna cu:AA le Paletwa kong he pehtlai in hmailei caah zeibantuk timhtuahnak dah an ngeih hna?
Anmah peng chung i Chinmi pengtlang dang hriamtlai nih an hung luh tikah an duh lo ngai va si kaw Paletwa Laihlum Khumi unau hna nih teh AA raltuk an bawmh hna khi zeitin an ruah lai, ti teh an hei ruat bal hnga maw?
Atu Chin hriamtlai pawl kal cio ning zoh tikah peng ri, tlang ri in i then chin lengmang khawh kan si. AA le NUG zong an kal ning ai dan tikah kan lam zawh mi zong i dan chin lengmang khawh a si. Atu ah AA an umter hnanak pawl hi AA nih amah himnak caah hau ai kulhnak ti khawh an si hnga.
Hi an umnak hin chuahter awk an tha te hnga maw? Ral lio ahcun an ti lai, a dik, ral hi teh AA nih zeiltuk sau dah tuk ai timh hnga? Atu hnu kum kul kum sawmthum a sau rih kho. Khi tiang khi maw an hei umter te ko hnga hnga?
Asiloah MDF nih Mararam ai hlum paoh ahcun Arakan he um zong a poi lo. K’Cho zong nih zalonnak kan ngah ding paoh ahcun Arakan tang um zong cu zei hme, an hei ti hnga dah.
CCN he interview i Tun Myat Naing bia cu maw an zumh taktak ko? Kanmah le kanmah nak cun maw Rakhine cứ an zumh deuh taktak ko hnga?
Ti pawl khi keimah hal in kai hal i ka buai ngai ve tawn. General Tun Myiat Naing a pumpak in an uar khi cu ka theihthiam hna. Rakhine he ram ser ngàmh tiang in an uar mi tu khi cu ka minung sinak in Chin pakhat sinak in a ruah zong ka ruah khawh lomi, a fian zong ka fian khawh lomi, zeitik hmanh i fawi te ah ka lemh khawh lo dingmi ruahnak a si.
Chin min in hriam a tlai ttung i Paletwa kong a ruat chih lomi hi cu dohthlennak a tuahmi ah ka hmu kho hna lo. Lamzawh in a aumi protesters tluk ceo lawng ka mit ahcun an si. Mang Hram Kung