ALP Ralkap Chungtel 20 Leng Cu Rakhine Hriamtlai AA Nih An Tlaih Hna. ALP ralkap chungtel 20 leng cu a luancia thla ah ULA/AA nih an tlaih hna, tiah ALP in chimphuannak nawlngeitu Major Zaw Min Thein nih a chim.”A luancia thla ah kan party chungtel ralkap 20 leng cu AA nih an tlaih hna. Hi kong hi mizapi sinah theihter kan duh lo. Kan tlaih khawh ve ko hna nain kan tlai duh hna lo. A ruang cu Rakhine ram ca ah a ṭuan ciomi kan si. Khat le khat karah buainak le kahdohnak a chuah lai kan duh lo,” tiah a chim.ULA/ AA he hriamtlaih ṭi ding kan duh ko nain AA cu nawlpeknak pakhat tangah an um i hranhram uknak bantuk a si caah kan cohlang kho lo, tiah ALP nih an langhter.
ALP hi phunih in an rak i ṭhen hlanah ALP le ULA/AA cu hriamtlaih ṭi dingin ceihkhannak an rak ngei ko nain atu tiang an i fonh kho hlei rih lo, tiah theih a si.Pi Saw Mya Yar Zar Lin nih a hruaimi ALP cu mizapi hlen le kahdohnak lam i thim in rian a ṭuanmi kan si lo i, remdaihnak papak in SAC nih an tuahmi NCA lamthluan a zultu kan si, tiah an langhter.ULA/AA telh in a dang Rakhine hriamtlai hna cu kahdohnak lam i thim in an kal i, cheukhat hriamtlai phu hna cu a ruang tampi ruangah kahdaihnak minsen an thut, tiah theih a si.
Mary Thluachuah Bawipa cu na cungah a um I thluachuahnak tampi in an pek” tiah a ti (Luke 1: 28)“Nihin thawkin hmai lei ahcun mi vialte nih thluachuaknu an ka ti lai. Bawipa, a thawngmi Pathian nih ka cungah khuaruahhar tukin rian a tuan” (Luke 1: 48- 49).Fahnak hi phun hnih in then khawh a si.
Minung tuahmi le kokek fahnak ti in. Pahnih an si nain, a chel ahcun an then khawh an si lo. Biana ah, raltuk (minung tuahmi) ruang ah Mangtam (kokek) a tlung, ti bantuk. Cun a cuantu dirhmun le a ingtu dirhmun cu ai hlat tuk hringhran khi a si. Cancer zawtnak a kherhlaitu Sibawi dirhmun le a ingtu, “Na cancer, thla thum long na nung cang lai” ti in thongchia thanhmi dirhmun cu van le vulei tlukin ai thlau.
Kan ram dirhmun cu chim hau lo a si. Hi zongah hin kan tuar cio kan ti ko buah, a hmun in a ingtuartu caah cun a fak hringhran khi a si ko. Lung hi a fak ko. Minung holh nih a tlinh lo. Inn lo hrawh in khangh piak an si. An pum, an kutke a pekchanmi le nunnak tiang a pemi kan tamtuk cang. Tantakmi chungkhar le cingla rualchan caah a fak hringhran khi a si ko. Fahnak kong ah biahalnak hi, minung hngalhnak pinlei a si. Nain bawmchantu tal a si hnga maw ti ruahchannak he Pathian bia ka rak I thawh.
Nai CNA Bawino, Lal Ro Tluang thih kan lung a fak cio. Amah ca long hlah, mi zei ca zongah, hi MAH ruangah hi tluk kan tuar hi a fak hringhran. Lung hi a fak tuk. A nu hi Pathian duh tukmi asi. Cu ruang ah a si lai. An unau rual in an fel dih, an ka ti. Khua ka chuah taknak a sau cang caah. Kuak hmanh an zu hna lo, an ka ti. Tluangram kan dirhmun in cu cu a mak ngaimi a si. Zumtu tha a si bang, tutan zong tuarzia a thiam tuk, ka ti. Nain naihniam te kan si caah bia kan I ruah. A chimmi bia pakhat te ka lungah a um. “Ka thlacam Pathian nih a ka theih piak rua lo e” a ti. Amah long a si lo. Kan si cio. A nung Pathian kan biak tung? Pharoah kut in Israel luat tertu, Rilisen leiro in a tan tertu Pathian kan biak ka ti tung, ziah kan thlacamnak Pathian nih a thei lo maw? Nihin kan dirhmun cun kan mawh maw zei?
Christmas camtuak a si. Phundang in ka thinlung ah a lang. Mary kong a si. Christmas thawngtha phurtu vancungmi nih Mary cu “Pathian nih thluachuah tampi an pek” a ti. Amah Mary zong nih “Mi vialte nih thluachuaknu an ka ti lai” a ti ve. Nain Mary nun zoh tikah, nihin zumtu tamu kan tahfung cun thluachuah cu a hmu maw? Thluachuah hmuh cu chim lo, zaran hmanh a tluk hme maw, ti awk te khin a um. Asi ahcun, vancung mi le Mary cu an I palh maw? Palh nemmam hlah, Pathian fialmi le thimmi si nalak ah, ti a si hnga. A si ahcun, Mary thluachuah cu zeidah an si kun?
Harnak le thangchiatnak
Pathian nih a chonh le cangka in a vulei, saduhthah vialte cu an kiak dih. A chungmang an rawk dih cikcek. Nau a pawi bak in harnak, thangchiatnak le ningzahnak-mualphonak long te nih an zulh. A va sin um hlanah nau a pawi. “Lakfa a pawi” tin, thangchiatnak nih an khua a cul. Joseph hnakhaw tiang a va phan (Mtt 1: 18-20). A kong chia nih an khua, sang le zawl a khah in a khat, ti hngalh khawh a si. Hamtu tlangval nih a theih kha cu a dang nih an rak theih viar cang. Mah chung le naihniam nih kan thangchiat kan I theih tlai bik cu mu. Mi ceihphainak vialte a in. Nihin thluachuah kan timi cu a si lo hrim cu mu.
Nauta bik Caw inn ah A fater, Jesuh cu, Pathian khuakhannak a si caah Bethlehem ah hrin a hau (Micah 5: 2). A nicaan lai ah khual tlawn nih a kiah hna. A fawi lo mi a si. An santlaih lo ruang si loin, kanmah caah riahhmun te hmanh a ngei lo. Caw inn ah a hrin ai (Nihin ram thumnak ummi le bang cu, sunlawihnak phunphun kan tuah. Nu maw si pa, langhternak (gender reveal party) hmanh sunglawi in kan tuah. Nain annih cu mi khual khua ah, riahruun a tong lo. A fater Van Bawi hrinhniang cu Caw inn ah hrin in, Caw rawleinak kuang ah an thlim (Luke 2: 12). “Pathian na khuakhan hi theihthiam a har hringhran” an ti ve hnga maw?
Ral an zam ve- An tuar fak ko cang, a dong rua lai, ti nalak ah, a dong nemmem lo. Naute cu Herod nih thah a timh. Cu caah “Izipt ram ah va zam uh” vancung mi nih a van ti rih hna ai (Mtt 2: 13- 15). A va mak ve. Vanbawi fapa rilmal. A niam bik ai thim long hmanh si loin, ralzam pi a hau. Thuh pi a hau. Ziah a thawngmi Pathian na si ne lo maw? Hi hngakchia pakhat hmanh na veng kho lo maw, ti awk te khin a um. Zeidah mi thluachuak ka sinak cu a si? Ka vansannak na ka hmuh piak lo maw, an ti ve hnga maw?
Dohkalh & sawiselnak- A fapa (Jesuh) a hong cu za. Ai ning deuh hlei lo. Mi nih a hrut ah an ruah caan zong a um. A unau hna nih ningzah celh loah dawh an va timh. “A hrut cang, an ti kha a chungle nih an theih tikah, kan va hnuh lai, tiah an I thawh” (Mark 3: 21). A unau zong nih an zum ve lo (John 7: 5). Cu pinah vulei reng le sining sang pakhat hmanh a ngei lo. A comi cu, soiselnak le thangchiatnak a si. An ram hruaitu hna le upat mi hna nih an doh i an kalh. A hawikawm pawl zong, tihzahmi an um lo. Mi nih zeirel lomi, zohniammi, hlawhhlang, mizaw le dam lo an si. Thluachuaknu ka sinak cu zeidah a si hnga, ti caan a ngei ve men ko hnga. Nihin zumtu tamu nih thluachuah kan timi, a tingco ruam lo.
Thihnak fakbik (Vailamtah) a in- Thluachuahnak fapa a pawi. A saduhthah le chunmang an rawk dih. Thangchiat ningzahnak nih a zelh. Aniam bik Caw inn ah hrin in, caw rawleinak kuang ah an thlim. A himnak caah mi ramdang ah tlik in zampi a si. A hawng cu za. Sining sang le upatmi dirhmun a tingco lo. A donghnak ah a miphun nih an rawi I, Rom ralkap nih a rapthlak bikmi hremnak pek in a fak bik thihnak vailam ah thah a si. A in mi hi, a fak bikmi ningzahnak, hremnak le thihnak a si. Mary caah a fak hringhran lai. A hrinhniang domhtlaih khawh loin, ding lo taktak in, a fak bik hremnak le thihnak a hmaika bakah a in. A thinlung a kek in a man dih cikcek lai (John 19: 5).
Christmas nih a kan chimhmi cu, nihin zumtu tampi nih thluachuah kan timi hna hi, Pathian nih thluachuah a timi an si lem lo. Thluachuak nu, Mary nih pakhat hmanh a tingco hna lo. A tonmi hna hi, hrial kan duhmi, kan cung tlun lo ding in Pathian kan hal zungzalmi longte an si. Nain Pathian nih “Thluachuak nu” phundang in, “Thluachuah a hmumi nu” tiah a kawh.
Mary thluachuah cu zei set cu dah a si ne?Mary nun nih a kan cawnpiak mi cu Pathian nih thluachuah a timi le nihin thluachuah kan timi ai lo theng lo, ti hi asi. A pahnihnak ah, Mary thluachuah cu Pathian duhnak tlinter ah ai tel kha a si. Pathian duhnak a tuah kha a si. A miphun chanchuahnak caah ningzah le mualphonak in kha a si. A miphun caah harnak a ing. A miphun caah nunnak pek kha si. An chungkhar nih thihnak tiang an ton. Cu cu a miphun caah a si. A dingmi Pathian pennak a um khawhnak ding ah an I tel ve kha a si. Vancung mi he an i ton ah fiang tein a lang. Nau na pawi lai, fapa na hrin lai.
Na fapa nihcun a miphun a khamh hna lai, a ti. Cu cohlan kha fawi lo. Judah phungin harnak, ningzahnak le thihnak tiang ton khawh a si kha a theih ko (Joseph nih thi hlah sehlaw, lung in thi lak in cheh a tong lai. A pa chungkhar caah ningzahnak rapthlak a tuah a si hnga. E a ti ah hi rish sang tak tak a si). Nain, Mary nih, “Kei cu Bawipa salnu ka si ko, na chim bang si ko seh” tiah a ti (Luke 1: 38). “Nangmah nawl si ko seh” ti cu, kanmah duhmi si loin, a kan fialtu duhnak I thim kha a si zungzal. A sullam cu, “Bawipa, kan miphun khamh an sinak ding ahcun, kei cu zei caan poh va cang ko ning. A poi lo, ka in ko lai” ti khi a si. Pathian ram ahcun “A nunnak a humhakmi nih sungh in, a sungmi nih nunnak hmuh a si lai” ti a si zungzal kha mu.
Kan saduthah le lungtlitum vialte a rawh dih hi, thluachuah hmuh lo a si lo. A donghnak zong a si fawn lo. Har kan ton le ral kan zam zong hi Pathian umpi lo bia a si lo. Fah kan in hi kan thlacam Pathian nih a theih lo a si hrim lo. Christmas tuanbia nih tha tein a kan chimh. Pathian caah zumh awk tlak tein um I, thildik ca le a miphun caah kan tuan hi, Pathian nih thluachuah a timi cu a si. Mary thuachuah cu, a miphun caah nunnak le sining dihlak pek a si. Thihnak in a thawhthannak nih “Thihnak teitu Pathian” a sinak a lang.
Nai Hakha dohnak ah a kan thih takmi, CNA Bawino, Lal Ro Tluang bia, “Ka nu, pa terual chuak kan si. Midang nih ram caah nunnak pekin an tuan lio ah, zeiruang ah dah kei vial cu ramdang ah ka va zam hnga? Ka zam lai lo. Kan chan he ai ton caah tuan ve ko ning. I thawh ve ko ning. Ka thlauh sawh hlah u. Thihhak le nunnak cu Pathian nawl si ko seh” tiah a nu le ramleng um a u le nih ramdang kal ding an forh len lio ah a nawlnak hna bia a si. Christmas daihnak le hnangamnak nan dihlak cung um ko seh! Van Hlei Thang-update