Kalaymyo, Kyutungpin sang ah nihin November 6 zinglei suimilam 3:00 ah Taungphilar tlang pawng inn pakhat cu min hngalh lomi mi bu nih an luhhnawh i inn ngeitu pastor pakhat an thah pinah a fapa zong hliam a tuar, tiah thah a tongmi hna chungkhar he naihniam in a ummi nih an chim.
Thah a tongmi hi kum 50 hrawng Pastor Paung Khan Dal a si i bible sianginn a kai pah in Tedim peng Luphe khua Baptish Church ah a laang in Pathian rian a ṭuanmi a si, tiah chungkhar he naihniam in a ummi nih Zalen ah a chim.
Pastor Paung Khan Dal chungkhar he naihniam in a ummi pakhat nih cun, “Pastor pa a inn cu mi pathum tluk nih an luhhnawh i meithal deu in an tlerh hna. Tangka sing 500 nan ngei tiin kan theih kan pe u mifir le mi inn luhhnawhtu kan si an ti hna.
Pastor pa cu a a hnakhaw hnulei in nam in an sawh i a nunnak a liam. Mifir nih an phone lung 1 le meithal deu pakhat zong Pastor pa a inn ah an thlau taak,” tiah Zalen ah a chim.
Nunnak a liammi Pastor Paung Khan Dal fapa zong a ṭaang ah nam in an sawh ve i an thlopbul cuahmah lio, tiah chungkhar nih an chim. Pastor Paung Khan Dal ruak cu a chuahkehnak khua Tedim peng Thuk Lai khua ah an tlunpi, tiah theih a si. The Chin Post