Central Lairam, Lawngtlai 2023 Pur 07: Pur thlachung Lawngtlai District ah STI, HIV, TB le Hepatitis dohnak (campaign) kalpi dingin hramthawknak caanhmannak cu nihin ah CMO Conference Hall, Lawngtlai ah Lawngtlai Additional Deputy Commissioner Pu Abraham Beirazi Khithie hna he an tuah.
Hi caan ahhin khuallian Pu Abraham Beirazi Khithie nih ” STI, HIV/AIDS, TB le Hepatitis hna hi vuleicung ah zawtnak karhrang ngaimi a sinak kong a chim. Cun Mizoram cu India ram ah, hi zawtnak hmuhtam biknak a si kong zong a chim. Hi zawtnak karhnakbik State mi sinak kong zong a chim. Hi zawtnak karhnak hmun tambik cu thonginn ah a si tawn, thong tlami lakah le home le centre kip ah hi zawtnak kongkau hi fak pi’n kan i chim. I venning le i zohkhenh ning tha te’n i chimh a biapi tuk” tiah a chim.
Hi Campaign thawknak caan hmannak hi Lawngtlai District AIDS Control Officer Dr S. Thaizi nih hruai in, khual upatmi LIKBK Bazar zohkhenhtu Pastor Rev. TH Vanlalzaua nih ” Lawngtlai District ah hi Campaign biapi ngaingai mi kalpi ding ahhin cozah tuanvo laknak thawnnak ding caah Khrihfabu nih a tuah khawh dingmi a um ah cun a si khawhchung in zuam an timhnak kong a chim”.
Hi caan ahhin Lawngtlai ART Centre ah Medical Officer Dr Malsawmtluanga nih kum 2021 in kum 2023 Biangreithlep tiang Lawngtlai District dirhmun felfai te’n report a pek . Report nih a langhter ning ah cun 2021 Nohawng in 2023 Biangreithlep tiang thi zohfelmi ah HIV positive hmuhthar mi kumtling cang mi pa 225, nu kumtling 117, pa ngakchia 5 le nu ngakchia 8 an si. An dihlak ah minung 355 an si. An lak ah pa minung 11 cu an nunnak liam. Lawngtlai ah ART Centre kalpi a si caah midang cu tha te’n zohkhenhnak an hmu.
Tukum 2023 Tangkawng- Vaute thla chung ah TB lunghrinhmi zohfelmi minung 5,156 an um, an lak ah minung 13 cu TB zawtnak an ngei tiah fehter an si. Hi TB zawtnak ngeimi hna hi zohkhenhnak tha an hmu. TB zawtnak in nunnak liammi an um lo. Hepatitis C lunghrinhmi test mi zat hi kum 2019 – 2023 Biangreithlep tiang minung 6,817 an si. Hi lak ah Hepatitis hmuhmi minung 340 an um. An lak ah zohkhenh i a dam thanmi 213 an si. Treatment la lio mi 132 an um. Treatment la lo in minung 81 an um. Hepatitis B lunghrinh test mi zat minung 6,731 an si. Hi ahhin minung 182 cu Hepatitis B zawtnak an ngei. An lakah minung 31 nih damnak an hmuh.
National AIDS Control Organisation (NACO) in, Prison & Other Closed Settings ( thonginn le home bantuk) ah 2023 Pur thlachung ahhin STI, HIV, TB le Hepatitis dohnak ding timhtuahnak ngeih a si caah Lawngtlai District chung zong ahhin dohnak tuah a si lai. Timhtuah ning ah cun District thonginn hna, rithaisii tawngthammi zohkhenhnak (Drug De-addiction Centre) kip hna, Observation Home, Women & Child Development tangah Swadhar Greh, Ujjawalla le One Stop Centre hna ah campaign hi kalpi a si lai. Campaign chung ahhin a herh ning in STI, HIV, TB le Hepatitis test kalpi timh a si caah a herh ah cun health camp zong timhtuah a si lai. The Lairam Times