Nimin April ni 4, 2023 (Ningani) khan Chakma Autonomus District Council inthlan lo awm tur inbuatsaihnaah Congress Party chuan Borapansuri-II ah Vantlang Inkhawm a buatsaih a, MPCC President Pu Lalsawta’n a hmanpui.
MPCC President Pu Lalsawta chuan, Chakma mipuite, Mizoram hmun tinah mi rethei tam tak kan awm a. Keimahni tan hian kan din chhuah theihna turin ‘Tang Puihna’ kan pe dawn che u. Hna hrang hrang thawkte tan cheng Nuai hnih aia tlem lovin kan pui dawn a ni. He rama cheng mipuite hi mi taima ram kan din sak dawn a ni, a ti.
Finance Minister a nih laia Mr. Clean tia hriat lar Pu Lalsawta chuan, Mizoram chhunga hnam tin tana ding thin leh ding reng chu Congress Party a ni. A changa Chakma tel lo sorkar kan din dawn ti a, a changa Chakma kan en hrang lo che u, tia Parṭhi awrhtir leh hnuhnawh ang mai mai hi Congress Party a ni ve lo, a ti a. ZPM party hi mi hmuha ṭha tak anga lang, Sorkar hma pawha Candidate vanga buai, MLA Candidate-ah lamṭang nei tam zawk nih tuma buai an ni, a ti bawk.
Pu Lalsawta chuan, CADC inthlan turah Congress Party-ah hmel thar nitin hmuh tur a awm chho zel chu lawmawm a tih thu sawiin, CADC inthlan turah Ṭhalai lehkhathiam ten Congress an zawm nasa a, Candidate pawh kan nei ṭha ber a. CADC-a Congress Party Candidate-te in vote hian in dam khawchhuah nan Vote in thlak a ni. CADC inthlan hnuah kum tawpah nangmahni aiawha ding tur kan thlang dawn.
Mizoram tan, Chakma ram mipuite tan sorkar ṭha tak kan siam dawn. In tan Vote thlak rawh u. Congress party-in Mizoram tan sorkar Tha siam a tum dan leh Autonomous District Council (CADC) a kalpui a tum dan chu ram leh hnam tan a ṭha a ni, tih sawiin, Congress Party chuan, Inthlanna ral muang tak, tluang taka neih a nih theih nan theihtawp kan chhuah a. CADC inthlanah MDC tha tak, Chakma ram leh Chakma mipuite’n an neih kan duh a. Chakma mipuite pawhin kan duhna min ṭawmpui a ni tih kan hria, a ti.
MPCC President Pu Lalsawta chuan Congress Party chuan Chakma mipui teh leh Mizoram mipuite tan Congress Party chuan an dinhmun siam sak turin ‘Tang Puihna’ Rs. 2,00,000/- (nuai hnih) hmangin kan pui dawn. Mipui mamawh inṭawm ang chi-ah phei chuan cheng vaibelchhe tel thlengin an mamawhna zawnah sorkar a che dawn. Hei hi a thlawna sem a ni lo, a mamawh leh hlawhtling ngei tura thawktute hnenah chauh ‘Ṭang Puihna’ hi pek tur a ni, a ti bawk.
NEDP-ah hmasawnna Hnathawhna tur atan Congress Party Sorkar lai pawhin a ṭul apianga hman turin kum khatah NEDP hnuaiah cheng vaibelchhe 1,000 zet kan dah thei. Thil harsa a ni lo, a ti a. Mizoram hi hnam taima leh tumruh, state taima kan nih chuan kan Pathian pawhin mal min sawm ang. Hetiang ni tur hian Congress party Candidate-te hmanga bul in ṭan chuan heng hi kan ti thei dawn a ni, a ti bawk.
Vawiina Borapansuri-II a Vantlang inkhawmah hian MLA Pu Nihar Kanti Chakma, Mahila President Pi Vanlalawmpuii Chawngthu, President Mahila Hqrs, MPYCC President Dr. Lalmalsawma Nghaka leh CADC inthlan tura Candidate mi 3 te’n thu an sawi bawk.