Dr. Sasa a soisel hmasa tu hi Salai Lairamthang a rak si

Nizaan ah Salai Lairamthang catial mi ka rel, Chin mi tampi nih Dr. Sasa hna cu an soisel ve, Chin miphun caah Arfi ceu bantuk a si i an thih hnu tiang hmanh ah an tluk hlei fawn lai lo tiah a tial mi ka hmuh.

Salai Lairamthang nih Dr. Sasa a vun dirhkam ning hi mifim caah cun ningzak  ngai a si – TIMES OF CHIN NEWS

A ngaingai ti ahcun Dr. Sasa a rak soisel hmasa biktu hi a mah Salai Lairamthang a rak si. Dr. Sasa nih Lailenpi ah Airport a tuah timh timi thawngpang a um lio ah kan pale mifim cathiam, social media ah theih hngalh deuh mi tampi cu dai tein an um ko, cun a cheu nih lomhpi nak an rak chim cio.

A sinain Salai Lairamthang nih soiselnak fak ngai in a rak tuah. Cucu social media tampi zong nih copy an rak tuah chin cio. Dr. Sasa cu mifim cathiam puitling ah ruah a sinain, Miphun ca si loin a mah Lailenpi lawng ca ah pei a ruah ko hi ti bantuk in ca a rak tial. Cun Comment tete zong ah Dr. Sasa a rak soisel len.

Hi hi a mah pumpak zong nih aa theih bak ko lai, a sinain a tu ahcun Chin mipi nih Dr. Sasa nan soisel ve cu ningzak a si, nan thih tiang nan tluk lai lo a ti tikah mah nih a soisel mi kha teh, a rak tluk ca ah maw a si hnga timi a ka ruah ter ngai. Tutan ah CNLD lei zong nih Dr. Sasa hi hramhram in an soisel lo.

A mah Dr. Sasa nih CNLD pawl cu zeihmanh an tuah khawh ding a um lo, van in Lungvar tla hmah sehlaw a tawlrel ning an thiam lai lo ti phun in Interview ah a chim mi ruang ah lehnak tete an tuah hi a si bik deuh. Cu lawng si loin Indirect in CNF a soiselnak, Chin party a soiselnak ruang ah CNLD lei nih lehnak an tuah pah mi tu hi asi.

Salai Lairamthang nih a rak soisel bantuk in a hram um lo pi in CNLD nih Dr. Sasa an soisel lo. CNLD upa hrim nih an soisel lo, CNLD a tanh tu cheukhat an si i cu hmanh cu a bia chim mi cungah lehnak an tuah bia a si tiah ka hmuh ning a si. Kaalawm Catialtu: Salai Chan Cung Lian