DALAANLO DALAAN RUAL. Dalaan Ka Silo An Ti Nain Dalaan Pawl. Third Party Zong Cu Tho Tho

DALAANLO DALAAN RUAL. Dalaan Ka Silo An Ti Nain Dalaan Pawl. Third Party Zong Cu Tho Tho

Hriamnam le CDF herh mi thilri bawmh duh loin, Bar le Club ah zan fatin kal in aa nuam zungzal mi pa, CDF le CNA cung ah Saya Ṭuan duh rih, Thantlang Khua Nupa nih Ralhrang cozah an tawn mi soisel tu cu thluak ngeih lo na hei ti, thluak cu na ngeih ko lai nain, Minung thluak asi lai lo, Zawng thluak dah ti lo ah: Dalaan thianhnak Programme um sehlaw, amah le Khua Nupa tu hi pei Dalaan Mangtara an si hi.

Nan tuah mi hi zei asi nan hngalh rua lo. Hngalh ko buin nan tuak bal lai lo. Nan tuah mi hi: CDF / CNA thihnak lawng asi lo, Cihmih nak lei ah lamsial tu nan si. CHIN mi zungzal saalcan nak zong asi fawn. Nain Jesuh cu misual ngaithiam tu asi.

Misual mi le a tlau mi hna kawl awk ah hi vawlei ah ka ra a ti ko caa, Kanmah nih kutpar hmanh in tawngh ding an si lo. Kha pa zong kha, Pathian he I ceih te ko hna seh, Khua NUPA pa 4 ah Pathian chithi thuhmi aa tel ve. Pathian minung cu kanmah nih Biaceih khawh an si lo.

Misual khaw lal pa te zong kha misual ngaithiam tu Jesuh Pathian nih a ngai thiam ko lai, CHIN mino belte cu: anmah nawl asi ve.

Thihnak le nunnak karlak thil kong ah tamtuk naa thlak cang, na bia ning le na ti ning in a ra ve sual ahcun; theih ve ti hlah. CDF le CNA na zuam cawh le na sinkhaw a tam ko.Bar le Club ah: Beer le nu ṭhatlo he zan fatin I nuam zungzal cu: Kannih cu kan kal tak cang.

Kan caah Ekput bantuk men an si cang. Hnahchawl le Banhla hnah in chuncaw kan fun, Cite lo Chiti loin kan Eidin, Chiti ai ah TI kan din, nunnak caah kan in dinh chih.

Bar le Club ah nan lut nak le nan I nuamnak phaisa te kha CDF kan hlut uhlaw cu, Ral kan tei diam cang hnga. Thantlang Khua Nupa nih Ralhrang SAC he I tawn in mual an pho ve hnga lo. Zudawr le lakphak dawr ah na ṭhu ah siseh; Bar le Club ah na lut ah siseh;

Night Club ah zan khuadei Nungak he nan I nuam ah siseh; KTV ah hlasak in na tlo tuk lio le naa nuam tuk lio ah: Na Hawikom le na ṭhitrual CDF leng le vaal cu, Mitkuh cimh lo le zan merem loin Khuapi an veng I CHINLAND le CHIN MIPHUN an khumzual lio ti hi: tuak pah law kan duh ka kawi/ ka mo le hna.

CDF si na duh lo ahcun kan in hnek ve lai lo, nain nuamnak le din ei nak ah na hmang tawn mi na Ngunsawm tu kha Hriamnam zalhnak caah rak kan hlut ve cang rawh, Ral tei zawk zawk kan herh tuk. Suingun Lungvar le hlawnthil relcawk lo an kan chut; Innlo relcawk lo an ciam cang;

A sual lomi thisen tampi a luang; Vutcam asi cang mi nunnak le innlo khuapi vialte kha. CHIN, Kaya le Karen hi, a intuar bik mi kan si. CDF hriamnam zalhnak caah, Thereng bang a paw kuai hnik in: Khua Nupa cheukhat nih:

Tlangau cuahmah lio ah: Khua Nupa dang nih: Ralhrang he Meeting. Paw le Tai rek in Ram dawtu hna nih pek mi Ngunsawm a fir I a vaivuan tu hna hi: Dalaan kan si lo an ti lai nain, Dalaan Mangtara. SAC he meeting tuah tu le CDF doh in cathlah zong cu tho tho.

MAH le Ralhrang Rallokap a huat lo kan um lo. Thantlang Khua Nupa (4) zong nih an huat tuk ve. Nain thil um tu ning cu; mah ti khan asi ve lo. MAH nih um ter a duh mi le siter aduh mi hna ning poah in, kan um, kan nung ahcun:

MAH kan huat cu Pakpalawng asi ve. CDM kan ti mi cu MAH duh mi kha nem tein elh le tuah lo kha asi. CDM lo, CDF lo, Bawmhchan tu si loin, a karlak ah aum mi minung hi um khawh asi ve maw, Kha hna kha Third Party kan ti mi hna le Dalaan lo Dalaan rual ti mi cu an si.

Tnk: CDF thangṭhat cuaisannak cu FB ah tampi a thlah. Akaa pawt lak in le cilkadil tla in CDF caah a chimhrel. CDF lawmhnak caah Beer lang khat a cah. Tazakhan cu MAH asi tilo.

Nangmah pumpak kha na si. MAH rumnak caah thazang pek tu na si. Cigarette na cah rih. Thilman kai lio asi le Ruby tu cawk ning na ti. Fung khat ah 100 te lawng na hei ti rih.

MAH rumtertu na si kha naa hngalh lo. Thantlang NUPA hna zong MAH Zalonnak caah lamsialtu nan si ve. CDF cu zuu an din nan kan ti, Din awk kan I hmuh lo, Ramlak ah “RUM” an zuar lo. Lai kuak te kan I ceh ko hi aw, Tuak ko Unau.

Hmailei caah; Tefa caah tiah Angki rang le thilpuan hring kan cawk, Liang Phur rusai te he MAH siang Inn ah kan I thawh. Na hawi nu le na hawipa cazin an bau; Siang Inn an kai khawh ve ti lo, cucu hmailei caah asi ve lo bang.

Nupa hna Khua fak pi in, kan tuak pi tuah uh. Na hawi nu le na hawipa Siang Inn an kai ve lo mi kha CHIN ram le miphun puitling nak, damnak le Zalennak caah asi, Nangmah hmai lei caah asi, Techin fapar caah asi.

Pagan SPH Saw Lu cu Thong Inn ah amah khamh tu ah a ra mi Ciansittha kha mi fir tiah a au. Cu ko cu kan si rua, Thantlang Khua Nupa le U le nau hna. Degree nan hmuh tikah, Na pa ei le na nu ei chimh awk ah, ṭha tein naa byheart ding mi cu:

Keimah khamh awk ah a ra mi pa / nu kha mi fir tiah ka ti sual ti te ko. Mi ṭhep karah atlau mi Chungkhar hna, ka nu ka pa tiah kawh awk a ngeih ti lo mi hna, tar le ngakchia bawhte tiang in an hrum ai lio; hi hi tuanbia asi lo.

Tuksapur Ralhrang tuah serh nak hi nan philh khawh ko maw? Pathian lawng hi kan mah lei ah a ṭanh I aum cang rua. Tukhal le Khua Nupa nih Hnuchit in kaltak kan si cang. Ahodah an kan hlawt rih te hnga, an kan kal tak rih te lai, Ralhrang sin ah aa fonh ding mi le meeting tuah ding mi an tam tuk rih ko rua ka Mo.

Kan ram le miphun hi zalen ve cang seh, Puitling ve cang seh, Limhang le ropui nak in khah ve cang seh, a lam kip in ṭhancho ve cang seh, Mah tein khuakhan Lairelnak um camcin seh, ti kan duh ahcun:

Uai hninghniang in aum cang mi, thingkung kha, Ti pek, Vawlei ṭha pek, a kung doh hi philh ti lo ding in kan sawm hna. CHINMI tam deuh cu hi hi kan philh. Crd: Zingtincuai Cinzah