COVID-19 hi Pathian he lawng kan Tei Khawh Lai

Vawlei cung ram ngan ngan hna nih awlawk an i chonh pi. Hriamnaam tha tha ser kho tu le scientist thiam thiam hna zong nih an fimnak an hmang kho lo. Uktu bawi ngan ngan hna zong an lungre a theih hna. Mirum pi pi zong an an rumnak an i bochan ngam hlei lo. Mui dawh dawh ti mi minthang hna zong an i nuam kho lo. Cathiam le mi laar laar hna zong kan mah santlai lo te lungretheih tluk in an lungre thei dih.

Rum, fim, tthawn, dawh, thiam, bawi le mi sawhsawh kan i khat dih lio caan asi. Kut ttawl le thil cawk tung le inchung erh men nih a kan khamh lai lo. Kan tuah kho peng fawn lai lo. Pathian nih hin zei ti ko khin dah a ruah hnga ti awk in a um. Pathian cu dawtnak in khuakhangtu asi ti cu kan pom dih nain Pathian duhnak taktak hi a um ko lai ti cu a fiang. Theih timh len zongah Pathian riantuan ning hi theih thlu awk a tha lo mi tampi a um tawn.

A taya (just) lo ti awk dingin a um caan hi kan Pathian hi a um tawn.. nain kanmah mit in zoh lo in Amah lei si nak mit in cuanh ahcun kan Pathian hi a ho nih palhphawt awk a tha lo. Pathian khuakhannak ah kan i thlaak kho lo. Hi ti hin na ti loh, cu tin na ti loh tiin fim kan chim kho lo. Vawlei cung hmun tam pi ah Biakinn tampi man loin zuar le hrawh a si. Biakinn lawng kherkhuar in chiah sawh mi a tam tuk cang. Zumtu tampi biakinn panh kan zuam lo.

Biakinn nak in hmun nuam sawh sawh ah minung kan i bu deuh. Sunday chun te hmanh ah Amah thangthatnak pe loin mahduh nak a tuah mi kan tam tuk. Biakinn phan ko mi zong Pathian ngai ngai thangthat lem lo in zohdawh men ah biakinn panh sawh mi kan tam tuk. Thilpuan langhsarh duh le fimnak, thiamnak ,cawnnak langhter men le mah pom ning in a kal pi sawh mi kan tam tuk.

Khamhnak thawngtha au pi cu biapi chia loin vawlei kong men sawh sawh ah caan a pe mi cawnpiaktu kan tam tuk. Laarnak le mah pumpak thangthat kawl men nak ah Pathian Inn kan thurhhnomh caan a tlawm ti lo. Pawcawmnak pakhat bantuk men men ah a ruat mi le mah miaknak sawh sawh men ah rian ai khinh ve sawh mi kan tam tuk. Khrih rian ah lungawi diriam loin position ah a buai khim mi upa pi pi kan tam tuk.

Sertu Pathian ttihzahnak a um ti lo. A min lawng in zumtu kan tam tuk. Kan kaa lawngin bawipa,bawipa kan ti. Kan nunnak taktak ah kan bawi ter lo. Christmas, kumthar, thawhthan le ni sunglawi lawngah Pathian a bia sawh mi kan tam tuk. Crusade le Camping caan le puai ngan ngeih caan le khualngan ngeih caan ah a turcawl sawh mi kan tam tuk. Style thoh sawhnak men le mah duh zawng Music aw tlin ruang men ah aa hlip hlau mi zumtu deu kan tam tuk.

Jesuh cu a ka khamhtu asi ti zong ruat loin zumtu hna soiselnak men men in caan a hmang mi, mah pum diriamhnak le vawlei nuamhnak paar a tlaan sawh men mi kan tam tuk cang. Khrih zumtu hna thah nawn le rialdipnak cu vawlei cung ram ngan ngan hna ah hmuh cawk loin a tam tuk cang. Zumtu hna hrem khawh cu tthawn le thil ti khawh ah ruah a si. Rawl thaw nih a thawt hna bantuk in a thawt hna.

 

 

 

 

 

A cunglei kan chim bang, Bawipa hmai ah hin puanchia tlek bang pomhlawm awk tlak lo lawngte kan si. Pathian mithmai a kawl tak mi cu kan tlawm tuk cang. A ram le A pennak nak in kan mah duh mi cu a pakhatnak ah kan chiah. Pathian hmai ah ningzak ngai ngai mi zumtu/ sermi minung kan tam tuk cang. Cucaah a tu caan hi Pathian sinah bawmh hal caan a si lo, ngaihthiam hal caan tu asi deuh. Bawipa kan sualnak le tlin lo nak palhnak cio cungin kan ngai thiam ko tiah faak piin kan chim caan asi.

Thawngtha tak tak a si mi tu cu Pathian nih a fale kan i chir mi le a sinah lungthin tak tein ngaihthiam kan hal mi cu fawi zaang tein a kan leh zungzal. Nu nih a fa dawt a philh kho hnga maw, minung nih cun a philh caan um men ko lai, Kei nih cun kan philh hna lai lo a ti. A kan philh lo tu le a kan ruat zungzal tu a nung mi Pathian kan ngei.

Tlang hna khi ka hei cuan hna i bawmhnak khua zei in dah ka hmuh lai ka ti; bawmhnak ka hmuh ding mi cu Bawipa sinin a ra lai, van le vawlei sertu Bawi sinin. Ca rel tu vialte, Bawipa nih in huppheng in thluahchuah in pe ko hna seh! Bawipa nih sunparnak hmu ko seh! kai lawm. BY: Thawng Za Lin