Coronavirus cu thli in chonh khawh a si tiah China sii lei thiamsang hna nih an chim

Chinaram ah zawtnak ttihnung corona virus cu thli in chonh khawh a si tiah China sii lei thiamsang hna nih an chim. Corona virus kong he pehtlai in World Health Organization nihcun zawtnak ichonhbarh ning cu tumchuklei a panh tiah an rak chim ko nain Tuluk ram chungin coronavirus ruangah a thimi cu an karh chin lengmang.

January 9 ni tiangah mah zawtnak ruangah athim cu mi 800 leng an sicang tikah 2002-2003 kum ah SARS ruangah vawleicung hmun kip in a thimi hna nakin an tam deuh cang tiah theih asi. Zawtnak rak ithok nak hmun Hubei ramthen chungin mi 89 hna nih an thihpi than tiah theih asi.

Mah ruangah hin SARS ruangah vawleicung hmun kip in arak thimi 774 nak in coronavirus ruangah athimi cu an tam deuh cang. A liamcia ni 4 lioah khan zawtnak arak ithoknak Hubei ramthen cu a dai ngaicang nain cazin a karh khawh rihnak kong WHO nih arak chim hnuah mah bantuk thil acan hi asi.

Inchung lawngah um dingin nawl an rak chuah ruangah hin Hubei ramthen ah cun zeilei pohin harnak phun kip an tuar tiah theih asi. Tuah cun Tuluk ram chungah zawtnak hrik chonhbarh atongtu dihlak cu mi 37200 tiang an sicang.

Tuluk cozah nihcun minung ting tampi umnak khuapi hnacu aran nakin khar (erh) nak nawl arak chuah ruangah le mah virus ruangah zawtnak chuakmi asi tiah arak chimtu sibawi a thih ruangah hin mitampi hna nihcun cozah cawlcangh ningah an thin hunnak a zual chin hi asi.

Minung tampi hna nihcun an kumthar dih hnu zongah rian ah an lutrih hna lo i Shanghai khuapi zongah lengchuah tik pohah mask ivuah dingin nawl an rak chuah cang. Hubei ramthen lawng siloin ramthen cheukhat hna zongah chungkhar herhmi eidin cawk dingah chungkhar pakhat ah minung pakhat lawng ni hnih ah voi khat chuah sianh an si.